सिरहा : सिराहामा प्रहरी निरीक्षकसहित शुक्रबार ४२ जना कोरोना संक्रमित थपिएका छन् । इलाका प्रहरी कार्यालय लहानका प्रहरी निरीक्षक सुमित कुसवाहासहित २२ जना प्रहरी, नौजना थुनुवा र भारतको नयाँदिल्लीबाट फर्किएर पशुपति आदर्श माध्यमिक विद्यालय लहानस्थित क्वारेन्टाइनमा बस्दै आएका एकजनामा कोरोना पुष्टि भएको जिल्ला स्वास्थ्य कार्यालय सिराहाले जनाएको छ । यस्तै धनगढीमाई नगरपालिकाको नैनपुर स्वास्थ्य चौकीमा कार्यरत दुईजना स्वास्थ्यकर्मी, कन्ट्याक्ट ट्रेसिङमा परेका एकजना महिला र एकजना पुरुष गरी चारजनामा पनि कोरोना पुष्टि भएको छ । मिर्चैया नगरपालिकामा कार्यरत चारजना कर्मचारी, गोलबजार नगरपालिकाका एकजना स्वास्थ्यकर्मी र एकजना कर्मचारीमा कोरोना भेटिएको स्वास्थ्य प्रमुख कृष्णदेव यादवले बताए । यसअघि इलाका प्रहरी कार्यालय मिर्चैयाका प्रमुखसमेत रहेका प्रहरी नायव उपरीक्षक (डिएसपी) सन्तु जैसवाल, इलाका प्रहरी कार्यालय गोलबजारका प्रमुख प्रहरी निरीक्षक जनक पुरीमा पनि कोरोना देखिएको थियो ।
मृत्युपछि कोरोना पुष्टि
मिर्चैया नगरपालिका– ४ का ६८ वर्षीय वृद्धको मृत्युपछि कोरोना पुष्टि भएको छ । कोभिडसँग मिल्दोजुल्दो लक्षण देखिएपछि २ भदौमा उनको स्वाब संकलन गरिएको थियो । स्वाब संकलन गरिएको भोलिपल्टै (३ भदौ) उनको मृत्यु भएको थियो । शुक्रबार आएको स्वाब परीक्षणको नतिजामा भने उनमा कोरोना देखिएको स्वास्थ्य प्रमुख यादवले बताए । यससँगै सिराहामा कोरोना संक्रमणबाट मृत्यु हुनेको संख्या तीन पुगेको छ ।
