काठमाडौं। सुनसरीको देवानगञ्ज गाउँपालिका-३ कप्तानगञ्जमा हिन्दु र मुस्लिम समुदायबीच भएको झडप तथा उत्पन्न तनावको छानबिन गर्न गृह मन्त्रालयले उच्चस्तरीय छानबिन समिति गठन गरेको छ।
गृहमन्त्री सुधन गुरुङको अध्यक्षतामा सोमबार बिहान गृह मन्त्रालयमा बसेको मन्त्रीस्तरीय सुरक्षा बैठकले मन्त्रालयका सहसचिवको नेतृत्वमा सो समिति गठन गर्ने निर्णय गरेको हो। बैठकमा गृहसचिव, नेपाल प्रहरी तथा सशस्त्र प्रहरी बलका प्रमुखहरूलगायत उच्च सुरक्षा अधिकारीहरूको उपस्थिति रहेको थियो।
गृह मन्त्रालयका प्रवक्ता (सहसचिव) आनन्द काफ्लेका अनुसार सहसचिवको नेतृत्वमा बन्ने उक्त समितिमा सुरक्षा निकायका प्रतिनिधि, ऊर्जा मन्त्रालयका प्रतिनिधि र सुनसरीका सहायक प्रमुख जिल्ला अधिकारी पोषण लामिछाने सदस्य–सचिव रहनेछन्। छानबिन समितिको संयोजक (सहसचिव) को नाम भने मन्त्रालयले छिट्टै तोक्ने जनाएको छ।
विद्युत् पोलमा राखिएको धार्मिक झण्डा हटाउने विषय र मन्दिरमा ठूलो स्वरमा बजाइएको डीजे (ध्वनि) सम्बन्धी सामान्य विवादले उग्र रूप लिँदा आइतबार राति दुई समुदायबीच भिडन्त भएको थियो। स्थिति नियन्त्रणमा लिन प्रहरीले चलाएको गोली लागेर स्थानीय ओमप्रकाश मेहताको मृत्यु भएको छ भने केही स्थानीय र सुरक्षाकर्मी घाइते भएका छन्।
घटनापछि स्थानीय प्रशासनले थप हिंसा फैलिन नदिन र शान्ति-सुरक्षा कायम राख्न देवानगञ्ज तथा आसपासका सम्भावित संवेदनशील क्षेत्रहरूमा ठूलो संख्यामा सुरक्षाकर्मी परिचालन गरी निषेधाज्ञा (कर्फ्यु) जारी गरेको छ। मन्त्रालयले घटनाको निष्पक्ष छानबिन गरी दोषीमाथि कारबाही गर्ने र दुवै पक्षसँग समन्वय गरी सामाजिक सद्भाव कायम राख्न स्थानीय प्रशासनलाई निर्देशन दिइसकेको छ।
