राजविराज । राजविराजमा सुरु भएको ‘मेयर कप सप्तरी महिला प्राइड लिग टी–ट्वान्टी क्रिकेट प्रतियोगिता’को दोस्रो संस्करणको उद्घाटन खेलमै झापाकी अपसरी बेगमले शानदार शतक प्रहार गरेकी छिन्।
बुधबार स्थानीय पवि माविको खेल मैदानमा भएको खेलमा राजविराज रोयल्सका लागि ओपनरको रूपमा मैदानमा उत्रेकी बेगमले खडक क्वीन्सविरुद्ध ६६ बलमा १६ चौका र ३ छक्काको मद्दतले अविजित १०९ रनको योगदान दिइन्। यस शानदार पारीसँगै उनले आफ्नो टिमलाई निर्धारित २० ओभरमा ४ विकेट गुमाउँदै १७८ रनको विशाल योगफलमा पुर्याइन्।
रोयल्सका लागि सप्तरीकी साझी यादवले पनि उत्कृष्ट ४१ रनको योगदान दिइन्। बलिङतर्फ खडक क्वीन्सका भूमी सिंहले २ विकेट लिइन् भने मोनिका साह र टिका साहले १–१ विकेट हात पार्न सफल भए।
१७९ रनको लक्ष्य लिएर मैदानमा ओर्लेको खडक क्वीन्स टिम ६ विकेट गुमाएर ११४ रनमै समेटियो। खडकका लागि ममता चौधरीले सर्वाधिक ४८ रन बनाइन् भने मोनिका साह र टिका साहले समान १३–१३ रनको योगदान दिइन्।
राजविराज रोयल्सका प्रतिमा साह र अपेक्षा यादवले समान २–२ विकेट लिए। साक्षी र शतकीय नायिका अपसरी बेगमले १–१ विकेट हात पारिन्।
झापाकी मेचीनगरपालिका–६ की अपसरी बेगमलाई उत्कृष्ट प्रदर्शनका लागि ‘प्लेयर अफ द म्याच’ घोषणा गरिएको छ। प्रतियोगिताको सुरुवातमै रोचक र रोमाञ्चक खेल देखिएको छ भने आगामी खेलहरूप्रति दर्शकहरूमा उत्साह बढेको छ।
