काठमाडौं । पतञ्जलि योगपीठ तथा आयुर्वेद कम्पनीसँग सम्बन्धित हदबन्दी जग्गा हिनामिना प्रकरणमा मुछिएका पूर्वप्रधानमन्त्री माधवकुमार नेपाललाई विशेष अदालतले ३५ लाख रुपैयाँ धरौटीमा रिहा गर्न आदेश दिएको छ।
विशेष अदालतका न्यायाधीश तेजनारायण सिंह, रामबहादुर थापा र विदुर कोइरालाको इजलासले बुधबार नेपाललाई धरौटीमा छाड्न आदेश दिएको हो। अपराह्नदेखि विशेष अदालतमा उपस्थित रहेका नेपालसँग बयान लिइएपछि दुवै पक्षका वकिलहरूबीच थुनछेक बहस भएको थियो। बहसमा नेपाल पक्ष र सरकारी वकिल गरी दुवै पक्षबाट १० जना वकिल सहभागी भएका थिए।
अख्तियार दुरुपयोग अनुसन्धान आयोगले पतञ्जलि योगपीठको हदबन्दी जग्गा हिनामिना प्रकरणमा पूर्वप्रधानमन्त्री नेपालसहित ९३ जनाविरुद्ध विशेष अदालतमा मुद्दा दायर गरेको थियो। आयोगले नेपालविरुद्ध १८ करोड ५८ लाख ५० हजार रुपैयाँ बिगो मागदाबी गरेको छ।
विगतमा पतञ्जलि योगपीठको लागि हदबन्दी छुट दिने निर्णयमा नेपालले अनियमितता गरेको आरोपसहित विशेष अदालतमा मुद्दा दर्ता भएको हो। अदालतको आदेशअनुसार धरौटी बुझाएपछि नेपाललाई हालका लागि रिहा गरिएको छ।
