महेश सिंह लहान सिरहा –न्यूटन एजुकेसनल ईन्स्टिच्युट, लहान–८ द्वारा आयोजना गरिएको बिदाई तथा सम्मान समारोह भव्य रूपमा सम्पन्न भएको छ। लहान–७ स्थित मरवाडी सेवा सदनमा एक विशेष कार्यक्रमको आयोजना गरी सयौं विद्यार्थीहरूलाई टीका, माला, प्रमाणपत्र र उच्च सम्मानका साथ बिदाई गरिएको हो।
कार्यक्रमको अध्यक्षता संस्थापक प्रिन्सिपल कमलेश कुमार यादवले गरेका थिए। प्रमुख अतिथि उच्च शिक्षा परिषद् सिरहा लहानका कार्यालय प्रमुख संजय कुमार पाण्डेले विद्यार्थीहरूलाई जीवनका हरेक मोडमा कडा मेहनत र प्रतिस्पर्धामा अग्रसर हुन प्रेरित गरे। उनले बजारमा कडा प्रतिस्पर्धा रहेकाले त्यसअनुसार तयारी गर्न आवश्यक रहेको बताए।
१३ वर्षदेखि सफलतापूर्वक शिक्षण कार्य गर्दै आएको न्यूटन ईन्स्टिच्युटले गुणस्तरीय शिक्षाको अभियानमा निरन्तरता दिँदै आएको छ। कार्यक्रममा एपेक्स ईन्स्टिच्युटका प्रिन्सिपल भरत प्रसाद साह, बिशाल ईन्स्टिच्युटका बिशाल साह, समाजसेवी मोहम्मद कलाम, कांग्रेस नेता अशोक चौधरी, शिक्षक पपु यादव उच्च शिक्षा परिषद्का कर्मचारी प्रमोद यादव, तराकान्त पण्डित लगायतको उल्लेखनीय उपस्थिति रहेको थियो।
विदाई कार्यक्रममा विद्यार्थीहरूका प्रतिभा उजागर गर्ने विभिन्न सांस्कृतिक कार्यक्रमहरू समेत प्रस्तुत गरिएको थियो। आयोजकका अनुसार विद्यार्थीको शैक्षिक यात्रामा अझ उत्कृष्ट उपलब्धिका लागि शुभकामना दिँदै कार्यक्रम समापन गरिएको हो।न्यूटन ईन्स्टिच्युट हाल लहानको शैक्षिक क्षेत्रमा मन जित्न सफल संस्थाका रूपमा चिनिएको छ।
