महेश सिंह सिरहा लहान – ग्रामीण क्षेत्रमा रहेका विशेषगरी वृद्धवृद्धालाई सहज रूपमा गाउँमै आँखा उपचार सेवा उपलब्ध गराउने उद्देश्यले सिरहाको नवराजपुर गाउँपालिका–३, जगतपुरस्थित तीनकोनी चोकमा साउन १४ गते बिहीबार एकदिने निःशुल्क आँखा शिविर सञ्चालन हुने भएको छ।
बालासुन्दरी आई केयर सेन्टर प्रा.लि., भगवानपुर–८, ठाडी, सिरहाको आयोजनामा सञ्चालन हुने शिविर बिहान ९ बजेदेखि बेलुका ५ बजेसम्म सञ्चालन गरिने स्थानीय शिव देव साहले जानकारी दिनुभयो।
शिविरमा दक्ष तथा अनुभवी चिकित्सकद्वारा आँखा परीक्षण गरिनेछ। सेवाग्राहीलाई आँखा जाँच तथा आवश्यक औषधि निःशुल्क उपलब्ध गराइनेछ भने चस्मा आवश्यक परे त्यसको शुल्क भने सेवाग्राही स्वयंले व्यहोर्नुपर्ने आयोजकले जनाएको छ।
आयोजकका अनुसार उमेरसँगै देखिने दृष्टि कमजोर हुने, मोतिबिन्दुलगायतका आँखासम्बन्धी समस्याको समयमै पहिचान र उपचार गर्ने उद्देश्यले शिविर सञ्चालन गर्न लागिएको हो। अस्पतालसम्म पुग्न कठिनाइ हुने ग्रामीण क्षेत्रका नागरिक, विशेषगरी वृद्धवृद्धाले शिविरबाट प्रत्यक्ष लाभ लिन सक्ने विश्वास गरिएको छ।
स्थानीय शिव देव साहले गाउँपालिका–३ सहित आसपासका बासिन्दालाई तोकिएको समयमा शिविरमा उपस्थित भई निःशुल्क आँखा परीक्षण गराउन आग्रह गर्नुभएको छ। उहाँले समयमै आँखाको परीक्षण र उपचारले दृष्टि गुम्ने जोखिम न्यूनीकरण गर्न सहयोग पुग्ने भएकाले सबैले अवसरको सदुपयोग गर्नुपर्ने बताउनुभयो।
