धनुषा : प्रत्येक वर्ष झै यसवर्ष पनि भगवान श्रीराम जानकीको विवाहको स्मरण जनकपुरधाममा हर्षोल्लास एवं उत्साहका साथ विवाह पञ्चमी महोत्सव मनाइदै छ ।
मंसिर शुक्ल पंचमीका दिनका भगवान श्रीराम जानकीबीच विवाह सम्पन्न भएको थियो । सोही स्मरणमा प्रत्येक वर्ष जनकपुरधामस्थित जानकी मन्दिर सप्ताह व्यापी रुपमा विवाह पंचमी महोत्सव मनाइदै आएको छ ।
मिथिला परम्परा अनुसार सम्पूर्ण विधि अपनाउंदै भगवान श्रीराम जानकीबीच वैवाहिक कार्यक्रम आयोजना गरिएको छ । रंगभूमि मैदानमा स्वयंवर कार्यक्रम सम्पन्न पश्चात सांझदेखि वैवाहिक कार्यक्रम शुरु भएको छ ।
सप्ताहव्यापी कार्यक्रम अन्तर्गत भोली रामकलेवा पश्चात जन्तीलाई विदाई गरी विवाह पञ्चमी महोत्सव सम्पन्न हुनेछ । यसअघि फुलबारी लिला, नगर दर्शन, धनुष यज्ञ, तिलकोत्सव र मटकोर लगायतका कार्यक्रम सम्पन्न भइसकेको छ ।
सीता स्वयंवरमा भगवान श्रीराम र माता जानकी दुवैको डोलालाई बाजागाजाका साथ नगर परिक्रमा सहित रंगभूमि मैदान एक अर्काबीच मिलान गराउनुका साथै दुवै पक्षका अभिभावकबीच सम्धी मिलान समेत सम्पन्न भएको छ ।
कोभिडका कारण यस वर्ष सीमानाका बन्द भएपछि भारतबाट श्रद्धालु भक्तजन र भगवान रामको नगर अयोध्याबाट जन्ती आएको आउन सकेको छैन । अन्य वर्षको तुलनामा श्रद्धालु भक्तजनको सहभागितामा निकै कमी आएको देखिएको छ ।
कोभिडका कारण श्रद्धालु र जन्ती नआएपनि वैवाहिक कार्यक्रम र सरसजावटमा कुनै कमी गरिएको छैन । जानकी मन्दिर दुल्हिन झै सजाइएको छ ।
स्वयंवर र वैवाहिक कार्यक्रममा भारतको अयोध्याबाट जन्ती टोली नआएपछि राम मन्दिरका महन्थ रामगिरी बाबाले भगवान रामको अभिभावकको भूमिका निर्वाह गरेका छन । माता जानकीको अभिभावकको भूमिका पत्येक वर्ष झै यसवर्ष पनि जानकी मन्दिरका महन्थ रामतपेश्वर दास वैष्णवले नै निर्वाह गरेका छन ।
आज राति सम्पन्न हुने वैवाहिक कार्यक्रमका लागि जानकी मन्दिरको प्रांगणमा मडवा सहितका मंच सजाइएको छ । मैथिली वैवाहिक विधि विधान र लोकगीत सहित वैवाहिक कार्यक्रम सम्पन्न हुनेछ ।
