काठमाडौं । चीनले अरूणाचल प्रदेश आफ्नो भएको र भारतले यहाँ अवैध रूपमा कब्जा गरेको बताएको छ । सांघाई विमानस्थलमा अरुणाचल प्रदेशकी एक महिलालाई १८ घण्टाको हिरासतमा राखेको विषयमा सोधिएको प्रश्नको जवाफ दिँदै चीनले यस्तो दाबी गरेको हो ।
मंगलबार दिइएको जवाफमा चीनले महिलामाथि यातनाको आरोप अस्वीकार गर्दै सांघाई विमानस्थलमा गरिएको कारबाही चिनियाँ कानून अनुसार गरिएको दाबी गरेको छ । नोभेम्बर २१ मा लन्डनबाट जापान यात्रा गरिरहेकी भारतीय महिला पेम्मा वाङजोम थोङडोक ट्रान्जिटको लागि सांघाई विमानस्थलमा अवतरण गरेकी थिइन् ।
यस क्रममा उनलाई अध्यागमनको क्रममा हिरासतमा लिइएको थियो। चिनियाँ अधिकारीहरूले उनलाई अरुणाचल प्रदेशकी भएको कारणले लगभग १८ घण्टा हिरासतमा राखेको उनले आरोप लगाएकी छिन् ।
घटनाको प्रतिक्रिया दिँदै चिनियाँ विदेश मन्त्रालयका प्रवक्ता माओ निङले पेम्मा वाङजोम थोङडोकलाई हिरासतमा नराखिएको र उनीमाथि कुनै पनि उत्पीडन नभएको बताइन् । उनले थपिन् – सम्पूर्ण प्रक्रिया चिनियाँ कानून र नियम अनुसार पूरा भएको थियो।
घटनाको बारेमा सोधिएका प्रश्नहरूको जवाफ दिँदै माओ निङले भनिन् – थोङडोकलाई आरोप लागेअनुसार “कुनै आवश्यक कारबाही, हिरासत वा उत्पीडन गरिएको थिएन । एयरलाइन्सले प्रक्रियाको क्रममा यात्रुलाई आराम गर्ने ठाउँ, खाना र पानी उपलब्ध गराएको थियो। चीनका सीमा निरीक्षण अधिकारीहरूले सम्पूर्ण प्रक्रिया कानून र नियमहरू अनुसार सञ्चालन गरेका थिए र सम्बन्धित व्यक्तिको वैध अधिकार र हितको पूर्ण रूपमा संरक्षण गरेका थिए।”
उनले अरुणाचल प्रदेशमाथि बेइजिङको क्षेत्रीय दाबी पनि दोहोर्याइन्, जसलाई चीनले जाङनान वा दक्षिण तिब्बत भन्छ। उनले भनिन्, “जाङनान चिनियाँ क्षेत्र हो। चीनले भारतद्वारा अवैध रूपमा सिर्जना गरिएको तथाकथित अरुणाचल प्रदेशलाई कहिल्यै मान्यता दिएको छैन।”
