हङकङकाे आवासीय क्षेत्रमा भीषण आगलागी, १३ जनाको मृत्यु

काठमाडौं। हङकङको ताई पो क्षेत्रस्थित एक आवासीय क्षेत्रमा भीषण आगलागी भएको छ। थुप्रै भवनहरूमा एकसाथ आगो लागेको र धुवाँको मुस्लो उठेको तस्बिरहरूमा देखिएको छ।

समाचार एजेन्सी रोयटर्सलाई उद्धृत गर्दै बीबीसीले हङकङको वाङ फुक कोर्ट हाउजिङ कम्प्लेक्समा आगलागी भएको जनाएको छ। कम्लेक्सका ८ ब्लकमा कुल २ हजार फ्ल्याट रहेको समाचारमा जनाइएको छ।

हङकङ सरकारका अनुसार स्थानीय समयअनुसार २ बजेर ५१ मिनेट जाँदा आगलागी सुरु भएको थियो। त्यसलगत्तै अग्निनियन्त्रकहरू खटिएका थिए।

बीबीसीका अनुसार आगलागीका कारण मृत्यु हुनेको संख्या १३ पुगेको छ। त्यस्तै २८ जना घाइते भएका छन्। मृत्यु भएकामध्ये एक जना अग्निनियन्त्रक पनि छन्।

आगलागी नियन्त्रणमा लिगनका लागि साढे ७ सयभन्दा बढी अग्निनियन्त्रकहरू खटिएका छन्। केही व्यक्तिहरू अझै आगलागीमा फसेका अनुमान गरिएको छ।