काठमाडौं । मेक्सिकोकी राष्ट्रपति क्लाउडिया शेनबाउमले बिहीबार सुरक्षा मन्त्रिपरिषद्ले ब्युटी इन्फ्लुएन्सरको हत्या प्रकरणको अनुसन्धान गरिरहेको बताएकी छिन्। टिकटकमा भिडियो लाइभ स्ट्रिम गरिरहेका बेला उनको हत्या भएको थियो।
अधिकारीहरूले २३ वर्षीया भ्यालेरिया मार्केजको मृत्युलाई सम्भावित फेमिसाइडको रूपमा अनुसन्धान भइरहेको बताएका छन्, जसको अर्थ पुरुषले कुनै महिला वा केटीलाई उनीहरूको लिङ्गको कारणले मार्नु हो।
महिला विरुद्धको हिंसा पहिले नै उच्च रहेको मेक्सिकोमा यस क्रूर हत्याले आक्रोश निम्त्याएको छ। राष्ट्रपति शेनबाउमले आफ्नो नियमित पत्रकार सम्मेलनमा भनिन्, ‘यस अवस्थाको लागि जिम्मेवार व्यक्तिहरू र यसको पछाडिको उद्देश्य पत्ता लगाउन अनुसन्धान भइरहेको छ। हाम्रो ऐक्यबद्धता भ्यालेरिया मार्केजको परिवारसँग छ।’
मार्केजको मे १३ मा जापोपान शहरको ब्यूटी सैलुनमा हत्या गरिएको थियो जहाँ उनी काम गर्थिन्। एक जना मानिसले सैलुनमा पसेर उनलाई गोली हानेका थिए । घटना हुनुभन्दा केही सेकेन्ड अघि मार्केजलाई उनको टिकटक खाताबाट लाइभ स्ट्रिमिङ गरिएको देखियो, जसमा उनी टेबलमा बसेर हातमा नरम खेलौना लिएको देखिन्छ।
लाइभस्ट्रिमको क्रममा, उनले “तिनीहरू आउँदैछन्” भन्दै गरेको सुनिन्छ त्यसपछि पृष्ठभूमिमा “हे, भेल?” भन्दै आवाज आउँछ। लाइभ स्ट्रिममा आवाज म्यूट गर्नुअघि मार्केजले पृष्ठभूमिमा भएको आवाजमा “हुन्छ” भन्ने जवाफ दिइन् । त्यसको केही समयपछि उनलाई गोली हानी मारियो। एक जना पुरुषले उनको फोन उठाइरहेको देखियो, जसको अनुहार भिडियो समाप्त हुनुभन्दा केही समय अघि लाइभस्ट्रिममा देखिन्थ्यो।
प्यारामेडिक्स टोलीले भ्यालेरिया मार्केजको टाउको र छातीमा गोली लागेर मृत्यु भएको पुष्टि गरेको छ। इन्स्टाग्राम र टिकटकमा लगभग २ लाख फलोअर्स भएकी मार्केजले लाइभस्ट्रिममा भनेकी थिइन् – उनी सैलुनमा नभएको बेला कोही उनलाई महँगो उपहार दिन आएको थियो।
चिन्तित देखिएकी मार्केजले उनी त्यो मान्छे फर्कने प्रतीक्षामा रहेको बताएकी थिइन् । मेक्सिकन अधिकारीहरूका अनुसार मार्केजको हत्या लिङ्गमा आधारित हिंसाको गम्भीर घटना हुन सक्छ र यसैको आधारमा अनुसन्धान भइरहेको छ। ल्याटिन अमेरिकामा लिङ्गमा आधारित हिंसा धेरै सामान्य छ, जहाँ महिलालाई उनको लिङ्गको कारणले आक्रमण गरिन्छ।
