धनुषा : प्रादेशिक अस्पताल जनकपुर अन्तर्गत अमेरिकी सरकारको सहयोगमा निर्माण हुने भनिएको प्रसुति अस्पताल शिलान्यासमै सिमित हुन गएको छ ।
करीब दुई वर्षअघि २०७५ साल मंसिर १ गतेका दिन तात्कालिन स्वास्थ्य तथा जनसंख्या मन्त्री उपेन्द्र यादवले शिलान्यास गरेको सो प्रसुति अस्पतालमा एउटा ईटा पनि थपिएको छैन ।
सुविधा सम्पन्न प्रादेशिक प्रसुति अस्पताल निर्माण हुने भएको सो अस्पतालको जग्गा फोहोर फाल्ने डंगुरको रुपमा परिणत भएको हुन गएको छ ।
युनाइटेड स्टेट अफ अमेरिकाद्वारा प्रादेशिक अस्पताल जनकपुरलाई प्रसुति अस्पतालका लागि भवन निर्माण र उपचार तथा रिशर्चका लागि अत्याधुनिक उपकरण सहितका लागि एक अर्ब रुपैया सहयोग गर्ने भनिएको थियो ।
अस्पतालका लागि करीब ९ करोडको लागतमा भवन निर्माणका लागि ठेक्का समेत लगाइ सकिएको थियो । सो अस्पतालको भवनको ठेक्का काठमाडौ स्थित सीबीसी कन्ट्रक्सन प्रा.लि.ले पाएको थियो । तर के कति कारणले हालसम्म निर्माणका लागि एउटा ईटा पनि थप्ने कार्य भएको छैन ।
दुई वर्षसम्म क कति कारणले निर्माण कार्य अघि बढन नसकेको बारे प्रादेशिक अस्पताल जनकपुरका मेडिकल सुपरिडेन्ट नागेन्द्र यादवे भने डकुमेन्टशन कार्य र कोरोना भाइरस महामारीको कारण ढिलाई हुन गएको हो ।
८० बेड सहितको प्रसुति अस्पतालका दुई तल्ले भुकम्प प्रतिरोधी भवन, अपरेशन विशेष रुम, रिचर्स रुम, चिकित्सक र स्वास्थ्यकर्मी बस्ने छुट्टा छुट्टै कोठा सहितको डिजानइन गरिएको थियो । तर निर्माण कार्य अघि बढन नसक्दा परियोजना नै अलपत्र पर्न गएको हो ।
निर्माण कार्य ढिलाई बारे दातृ निकाय अमेरिकी दूतावासका मनिष मिश्रले भने ठूलो परियोजनामा समय लाग्छ नै, शुरुमा डकुमेन्टशन कार्य पुरा गर्नमा ढिलाई भयो, जग्गाको डीपीआरका लागि जग्गाको सर्वेक्षण कार्य पनि सम्पन्न गरियौ तर अहिले आएर कोरोना महामारीले गर्दा रोकिएको हो ।
