काठमाडौं । सत्तारुढ दल नेपाल कम्युनिस्ट पार्टीको एकता जोगाउनका लागि चीनले सम्पूर्ण शक्ति प्रयोग गर्ने योजना बनाएको छ । चीनकै बलबुतामा भएको भनिएको एकता जोगाउन अहिले पनि चीन निकै सक्रियतापूर्वक लागिरहेको छ ।
प्रधानमन्त्रीसमेत रहेका पार्टी अध्यक्ष ओलीले पार्टी फुटाउने प्रस्ताव गरेपछि चीन एकाएक झस्किएको हो । लगत्तै जसरी पार्टी एकताको रक्षा गर्न चिनियाँ एजेन्टहरुले प्रचण्डलाई सन्देश पुर्याएका छन् ।
अहिले वरिष्ठ नेता माधवकुमार नेपालले मुख खोलेका छैनन् । उनले ओलीसँग भेट गरेपछि प्रचण्डसँग टाढिएका छन् । पूर्वमाओवादी अहिले पनि पार्टी एकतालाई जोगाउने पक्षमा देखिए पनि पूर्वएमाले भने अब पार्टी एक हनुनसक्ने र फुटाउनुको विकल्प नभएको भन्ने निष्कर्षमा पुगिसकेका छन् ।
त्यसको पछिल्लो उदाहरण उपप्रधानमन्त्री ईश्वर पोखरेलले दिएको पछिल्लो अभिव्यक्ति हो । ईश्वर पोखरेलले पार्टी एकतालाई प्रचण्डले नै संकटमा पारेको आरोप लगाएका थिए । उनले पार्टी अब एक हुन नसक्ने संकेत दिएका छन् ।
त्यसैगरी प्रधानमन्त्री ओलीका विश्वासपात्र भनिएका लुम्बिनी प्रदेशमा मुख्यमन्त्री शंकर पोखरेलले पनि पार्टी अब एक हुन नसक्ने संकेत गर्दै प्रचण्डविरुद्ध सामाजिक सञ्जालमा उत्रिएका छन् ।
चीनले दुबै पक्षका नेताहरुलाई संवाद र सहकार्यमार्फत अघि बढ्न दबाब दिइरहेको छ । यसअघि पनि पार्टी फुटको संघारमा पुगेको समयमा राष्ट्रपति विद्यादेवी भण्डारी र चिनियाँ राष्ट्रपति सी जिनपिङबीच संवाद भएको थियो । उक्त संवादपछि पार्टी एकता साम्य भएको थियो ।
अहिले पनि पार्टी फुट्नै पर्ने स्थितिमा पुगे राष्ट्रपतिमार्फत दबाब दिन लगाउने गरी तयारी भइरहेको स्रोतको दाबी छ ।
नेकपा स्थायी कमिटी सदस्यसमेत रहेका पूर्वएमालेका नेता बेदुराम भुसाल प्रधानमन्त्री केपी शर्मा ओलीको कार्यशैलीबाट आजित भएको निष्कर्षमा पुगेको बताएका छन् । कार्यशैली सच्याउनुपर्छ भन्दा फुट र विभाजनको हल्ला चलाएर ओलीले समस्या पन्छाउन खोजेको आरोप लगाएका छन् ।
