धनुषा : धनुषा प्रहरीले भन्सार छलेर गरी भारतबाट चोरी पौठारी गरी ल्याइएका २२ लाख रुपैयाभन्दा बढी मूल्य बराबरको खाद्य पदार्थ र लताकपडा सहितका सामाग्री बरामद गरेका छन ।
सुरक्षा गस्तीमा खटिएका प्रहरीले जिल्लाको विभिन्न स्थानबाट २२ लाख ८७ हजार ५ सय ९० रुपैया मूल्य बराबरको भन्सार छली गरी भारतबाट ल्याइएका खाद्य पदार्थ, भाडा कुडा, पान मशाला र लता कपडा सहितका सामाग्री बरामद गरेको हो ।
जिल्ला प्रहरी कार्यालय धनुषाका प्रहरी नायब उपरिक्षक मकेन्द्र मिश्रले दिएको जानकारी अनुसार सीमावर्ती क्षेत्र नगराईन नगरपालिकाको जटहीबाट १० लाख २७ हजारभन्दा बढीको लता कपडा र भाडा कुडा तस्करहरुबाट नियन्त्रणमा लिइएको हो ।
त्यसैगरी जनकनन्दनी गाउँपालिका १ निवासी कमली देवीको घरबाट भन्सार छली गरी ल्याएका पान मशाला राजनिवास, काठ रंग्ने चपरा, फलफूल पकाउने कार्बेट र एकथान मोटरसाइकल सहित १० लाख मूल्यभन्दा बढीको सामाग्री छापामारी गरी बरामद गरिएको छ ।
उनले भने शहीदनगर नगरपालिका ६ बाट समेत सादा पोशाकमा खटिएका प्रहरी टोलीले सुतीको साडी, गमछा, लेडिज सुटपिस लगायतका लताकपडा र मोटरसाइकल सहित अढाई लाखभन्दा बढी मूल्य बराबरको सामाग्री चेकजाँचको क्रममा बरामद गरिएको हो ।
बरामद गरिएका सबै सामाग्री आवश्यक कारवाहीका लागि भन्सार कार्यालय जनकपुरधाममा बुझाइएको उनले जनाएको छ । चाडपर्व नजिकदै जाँदा भन्सार छली गरी भारतबाट खाद्य पदार्थ र लता कपडा सहितका सामाग्रीको चोरी पैठारी बढन थालेपछि प्रहरी सक्रियता बढाएको हो ।
