महेश सिंह सिरहा, लहान –डिभिजन वन कार्यालय, लहानले खुट्टीखोलामा ढुंगा, गिट्टी तथा बालुवा उत्खनन खुला गर्न स्थानीयको माग अस्वीकार गर्दै वातावरणीय मापदण्डअनुसार प्रक्रिया पूरा नगरी यो कार्य सम्भव नभएको स्पष्ट पारेको छ। कार्यालय प्रमुख शैलेन्द्र कुमार मिश्रले कार्यालयको कुनै कमजोरी नरहेको दाबी गर्दै वातावरणीय ऐन र मापदण्डको पालना अनिवार्य रहेको बताए।खुट्टीखोलाको लम्बाइ १,९३० मिटर भए पनि सरे खोलामा पुल निर्माण भएकाले करिब ५०० मिटर दायाँ र ५०० मिटर बायाँ क्षेत्र छोडेर उत्खनन गर्नुपर्ने बाध्यता रहेको छ। वातावरण ऐन २०७६ र “नदी-खोला ढुंगा गिट्टी संकलन मापदण्ड कार्यविधि”अनुसार यो सम्भव नभएको वन कार्यालयले जनाएको छ।
स्थानीयले खुट्टीखोला उत्खनन तुरुन्त खुला गर्न माग गरिरहे पनि लहान नगरपालिकाबाट पठाइएको वातावरणीय प्रभाव मूल्यांकन (आईईई) प्रतिवेदनमा त्रुटि भएको कारण उत्खनन कार्य अघि बढाउन नसकिएको वन अधिकृत मनोज कुमार कर्णले जानकारी दिए।
कार्यालय प्रमुख मिश्रले भने, “नगरपालिकाबाट पठाइएको प्रतिवेदनमा आवश्यक सुधार गरेपछि हामी तुरुन्तै उत्खनन कार्य खुला गर्न तयार छौं।” उनले वातावरणीय मापदण्ड र प्राविधिक पक्ष सुनिश्चित गर्नु आवश्यक रहेको बताए।
स्थानीय माग र कार्यालयको प्राविधिक अडानबीच विवाद समाधानका लागि समन्वय र संवादको आवश्यकता रहेको सरोकारवालाहरूले बताएका छन्। वातावरणीय नियमको पालना गर्दै दुवै पक्षलाई चित्तबुझ्दो समाधान निकाल्न जोड दिइएको छ।
