काठमाडौँ : सरोकारवालाहरुले कोरानाको जोखिमको व्यवस्थापनमा ध्यान नदिदा नेपालमा कोरोना संक्रमितको संख्या ह्वात्तै बढेको बताएका छन् ।
साप नेपाल र प्रज्ञा फाउण्डेशनले बुधबार काठमाडौंमा कोरोना संक्रमणको अवस्थाका बारेमा आयोजना गरेको कार्यक्रममा उनीहरुले समयमा नै कोरोना नियन्त्रणका लागि प्रभावकारी कदम चाल्न नसक्दा संक्रमितको संख्या बढ्दै गएको बताएका छन् । उनीहरुले कोरोनाको असर नेपालमा लामो समयसम्म देखिन सक्ने तर्क पनि गरेका छन् । कार्यक्रममा डाक्टर दिवेश कर्मचार्यले कोरोनाको पहिलो स्टेजमा नै नेपालमा कोरोना संक्रमणको अवस्थामा बारेमा पूर्णअध्ययन हुन नसकेको बताउनुभयो । लकडाउन प्रभावकारी नहुनु र लकडाउनपछिको व्यवस्थापनमा पनि राज्यको कुनै योजना नदेखिएको उहाको भनाई छ ।
त्यस्तै डाक्टर रामकेवल साहले बिदेशबाट फर्किएका श्रमिकहरुलाई राज्यले आर्थिक प्याकेज दिन नसकेको भन्दै रोजगारीको समस्या लामो समयसम्म देखिने धारणा राख्नुभयो । उहाले कोरोना नियन्त्रणका लागि राज्य गम्भीर भएर लाग्नुपर्ने बताउनुभयो ।
कोरोना महामारीसम्बन्धी समूदायदेखि राष्ट्रियस्तरसम्म जनचेतना फैलाउने उदेश्यका साथ कार्यक्रमको आयोजना गरिएको साप नेपालकी अध्यक्ष गीता भट्टराईले जानकारी दिनुभयो ।
