विश्वका केही उत्कृष्ट प्रेमकथाहरू ती हुन्, जसमा मित्रता प्रेममा परिणत भएको छ । आफ्नो जीवनसाथीलाई आफ्नो सबैभन्दा मिल्ने साथी बनाउनु एक सुन्दर र गहिरो सम्बन्धको आधार हो । यो प्रक्रियामा समय, समर्पण र इमानदारीको आवश्यकता पर्छ । यदि कुनै सम्बन्धमा मित्रता र प्रेम दुवै छ भने त्यो सम्बन्ध झनै राम्रो हुन्छ ।
कसरी बन्न सकिन्छ आफ्नो पार्टनरको सबैभन्दा राम्रो साथी ?
१. खुला संवाद कायम राख्ने
सबैभन्दा मिल्ने साथीको विशेषता भनेको खुला र निःसङ्कोच कुराकानी हो । यस्तोमा जीवनसाथीसँग हरेक कुरा साझा गर्नाले विश्वास र समझदारी बढ्छ । त्यसैले हरेक दिन केही समय निकालेर एक–अर्कासँग कुरा गर्नुपर्छ । यो काम, परिवार वा साना कुराहरूबारे हुन सक्छ । जिवसाथीसँग आफ्नो खुसी, चिन्ता वा डरलाई स्पष्ट रूपमा साझा गर्नुपर्छ । कुनै कुराले चिन्तित बनाएको छ भने, त्यसलाई लुकाउनुको सट्टा भन्नुपर्छ । यसले सम्बन्धलाई अझै बलियो बनाउँछ ।
२. एक–अर्कालाई सम्मान र विश्वास गर्ने
विश्वास र सम्मानबिना कुनै पनि सम्बन्ध गहिरो बन्न सक्दैन । यो मिल्ने साथीको आधार हो । त्यसैले आफ्नो जीवनसाथीसँग सधैँ इमानदार हुनुपर्छ । सधैँ सत्य बोल्नुपर्छ । चाहे त्यो सानो कुरा होस् वा ठूलो ।
एक-अर्काप्रति सम्मान देखाउनुपर्छ । जीवनसाथीको विचार, भावना र निर्णयलाई महत्त्व दिनुपर्छ । यदि जीवनसाथीले आफ्नो करियरमा नयाँ निर्णय लिन्छ भने, असहमति भए पनि उनको दृष्टिकोण बुझ्ने प्रयास गर्नुपर्छ ।
३. सँगै गुणस्तरीय समय बिताउने
साझा अनुभवहरूले सम्बन्धलाई बलियो बनाउँछ र एक अर्कालाई गहिरो रूपमा बुझ्न मद्दत गर्छ । त्यसैले आफूसँग मिल्ने जीवनसाथीका रुचिहरू पत्ता लगाउने प्रयास गर्नुपर्छ । सँगै गर्न रमाइलो लाग्ने गतिविधिहरू जस्तैः हाइकिङ, खाना पकाउने वा नाच्ने गर्न सकिन्छ । यसो गर्दा एक-अर्काको झन् नजिक हुने वातावरण सिर्जना हुन्छ ।
४. साना कुराहरूमा ध्यान दिने
साना कुराहरूले पनि ठूलो प्रभाव पार्छ । जीवनसाथीको साना बानीहरू र रुचिहरूलाई ख्याल गर्नाले माया र साथ देखिन्छ । त्यसैले जीवनसाथीका साना–साना कुरा पनि याद गर्नुपर्छ । श्रीमान् वा श्रीमतीलाई मनपर्ने कफी, गीत वा किताबलाई याद गर्न सकिन्छ । जीवनसाथीलाई बिहान चिया बनाएर दिने वा मनपर्ने खाना बनाउने जस्ता सानो सहयोग गर्न सकिन्छ । साथै सानो सफलता वा प्रयासको प्रशंसा गर्नुपर्छ ।
५. हाँसो र रमाइलो
हाँसोले सम्बन्धमा तनाव कम गर्छ र रमाइला पलहरूले नजिक बनाउँछ । रमाइलोको लागि सँगै कमेडी चलचित्र हेर्न सकिन्छ वा रमाइला कथाहरू सुन्न, सुनाउन सकिन्छ । स्मरणहरू ताजा गरेर पनि रमाइलो वातावरण सिर्जन गर्न सकिन्छ । पुराना रमाइला पलहरू सम्झने जस्तै पहिलो भेट वा यात्राको कथा । सँगै पुराना फोटोहरू हेरेर हाँस्ने वा रमाइलो सम्झनाहरू साझा गर्न सकिन्छ ।
६. सहानुभूति र समर्थन देखाउने
सुख–दुखमा साथ दिनाले जीवनसाथीले आफ्नो सबैभन्दा ठूलो समर्थकको रूपमा देख्छन् । त्यसैले जीवनसाथीको सपना पूरा गर्न समर्थन गर्नुपर्छ । उसको करियर, सौख वा व्यक्तिगत लक्ष्यमा प्रोत्साहन दिनुपर्छ । जब साथी तनावमा हुन्छ उसको कुरा सुनेर सहयोग गरेर साथ दिनुपर्छ । उसका साना–ठूला सफलताहरू सँगै उत्सव मनाउनुपर्छ ।
७. व्यक्तिगत स्वतन्त्रता र आदर कायम राख्ने
मिल्ने साथीले एक-अर्काको व्यक्तिगत स्थान र स्वतन्त्रतालाई सम्मान गर्छ । यसले सम्बन्धमा सन्तुलन ल्याउँछ । त्यसैले जीवनसाथीलाई आफ्नो रुचिका काम गर्न वा साथीहरूसँग समय बिताउन प्रोत्साहन गर्नुपर्छ । उसको गोपनीयता र व्यक्तिगत निर्णयलाई आदर गर्नुपर्छ । साझा समय र व्यक्तिगत समयबीच सन्तुलन राख्नुपर्छ ।
८. सहयोगका लागि सधैँ तयार रहने
साथीहरू त्यसैका लागि हुन्छन्, जब उनीहरूको आवश्यकता पर्छ, उनीहरू सधैँ सहयोगका लागि तयार रहन्छन् । राम्रो–नराम्रो हरेक परिस्थितिमा साथ दिन्छन्, सँगै हाँस्छन्, उपलब्धिहरूलाई उत्सव मनाउँछन्, साथीको पीडालाई आफ्नो पीडा सम्झेर सँगै आँसु बगाउँछन् । यदि आफ्नो पार्टनरको सबैभन्दा राम्रो साथी बन्न चाहने हो भने हरेक परिस्थितिमा उनीहरूको साथ दिन सधैँ तयार रहनुपर्छ ।
९. कम रिसाउने
सामान्यतया मानिसहरू आफ्ना साथीहरूको तुलनामा ती व्यक्तिहरूमाथि धेरै रिसाउँछन्, जसलाई उनीहरू प्रेम गर्छन् । कसैले आफ्नो पार्टनरको हरेक कुरालाई अति गम्भीरतापूर्वक लिन्छन् र तुरुन्तै रिसाउँछन् । तर, यस्तो गर्दा सानो झगडाले पनि ठूलो रूप लिन सक्छ । त्यसैले जीवनसाथीको कुरा राम्ररी सुनेर प्रतिक्रिया दिनुपर्छ र कम रिसाउने प्रयास गर्नुपर्छ ।
आफ्नो सबैभन्दा राम्रो साथीलाई जति स्वतन्त्रता दिइन्छ त्यति नै आफ्नो पार्टनरलाई पनि दिनुपर्छ । यसो गर्दा सम्बन्ध अझै सुमधुर हुन्छ ।
१०. सबैभन्दा राम्रो साथीका गुणहरूको सूची बनाउने
आफ्नो सबैभन्दा राम्रो साथीमा कस्ता गुणहरू देख्न चाहनुहुन्छ, तिनको एउटा सूची तयार गर्नुपर्छ । राम्रो–नराम्रो दिनहरूमा सबैभन्दा राम्रो साथीको व्यवहार कस्तो हुनुपर्छ, दुवैले एक-अर्कासँग कस्ता र कुन कुराहरू गरिन्छ । त्यो सबै कुरा आफ्नो जीवनसाथीसँग गरियो भने जीवनसाथी पनि एकदमै मिल्ने साथी बन्न सक्छन् ।
