काठमाडौं । भोपालको कुटुम्ब न्यायालयमा हालै एउटा अनौठो घटना सार्वजनिक भएको छ, जसले ९० को दशकको चर्चित फिल्म ‘जुदाई’को सम्झना ताजा गराएको छ। शहरको एक परिवारमा शान्ति कायम गर्नका लागि सम्बन्धलाई वित्तीय सम्झौतामार्फत अन्त्य गरिएको छ।
एक महिलाले आफ्नो वैवाहिक जीवनमा विष घोलिरहेकी ‘सौता’सँग करिब डेढ करोड रुपैयाँ बराबरको सम्पत्ति र नगद लिएर पति सधैंका लागि उनको नाममा छाडिदिएकी छिन्। न्यायिक क्षेत्रमा यो ‘महँगो सम्बन्धविच्छेद’ अहिले व्यापक चर्चाको विषय बनेको छ।
मामिला केन्द्रीय सरकारी विभागसँग सम्बन्धित छ। त्यहाँ कार्यरत ४२ वर्षीय पुरुष अधिकारीको प्रेम सम्बन्ध आफ्नै सहकर्मी (५४ वर्षीया महिला)सँग सुरु भएको थियो। प्रेम सम्बन्ध गहिरिँदै जाँदा अधिकारीले आफ्नी पत्नी र दुई छोरीलाई बेवास्ता गर्न थाले। घरमा दैनिक विवादले वातावरण तनावपूर्ण बनेको थियो।
१६ र १२ वर्षकी दुई छोरीमाथि अभिभावकबीचको ‘महाभारत’को गम्भीर असर परेको थियो। मानसिक दबाबमा रहेकी ठूली छोरीले साहस देखाउँदै मुद्दा कुटुम्ब न्यायालयसम्म पुर्याइन्। काउन्सिलिङका क्रममा अधिकारीले स्पष्ट रूपमा भने– ‘म पत्नीसँग खुसी छैन, मानसिक शान्ति त प्रेमिकासँग मात्र पाउँछु।’
त्यसपछि पत्नीले व्यावहारिक बाटो रोज्दै माग राखिन्– ‘छोरीहरूको भविष्य र जीवनयापनका लागि डुप्लेक्स घर र २७ लाख रुपैयाँ नगद।’ आश्चर्यजनक रूपमा अधिकारीकी प्रेमिकाले बिना हिचकिचाहट यो शर्त स्वीकार गरिन्। उनका अनुसार उनले साथीको परिवारलाई बेसहारा देख्न चाहिनन्, त्यसैले जीवनभरको बचत यस सम्झौतामा खर्च गर्न तयार भइन्।
कुटुम्ब मामिलाका परामर्शदाताहरूको भनाइमा, जहाँ भावनात्मक सम्बन्ध समाप्त हुन्छ, त्यहाँ जबरजस्ती बस्नुभन्दा सम्मानजनक विदाई उत्तम हुन्छ। समाजलाई यो निर्णय असामान्य लागे पनि, बालबालिकाको मानसिक स्वास्थ्य र वित्तीय सुरक्षाको दृष्टिले यो तार्किक कदम मानिएको छ। सम्बन्ध बोझ मात्र बनेपछि शान्तिका लागि अलग हुनु नै उचित हुन्छ।
