काठमाडौं । सवारी लाइसेन्सको प्रयोगात्मक परीक्षा जटिल भएपछि सरकारले सहजै लाइसेन्स निकाल्ने प्रावधान ल्याउने भएको छ ।
प्रयोगात्मक परीक्षाको निर्देशिका परिवर्तन गरेर परीक्षामा ६० प्रतिशत अंक ल्याए पनि लाइसेन्स निकाल्न सकिने प्रावधान बनाउन लागिएको हो ।
अबको प्रावधानमा फिगर-8 टेस्ट, यू टर्न टेस्ट, न्यारो प्ल्यान्क टेस्ट, ट्राफिक लाइट टेस्ट, स्पिड ब्रेकर टेस्ट, र्याम्प टेस्ट, ग्यारेज पार्किङ टेस्टसहितको टेस्ट छन् । अब यी सबैमा छुट्टाछुट्टै अंकभार दिएर ६० प्रतिशत अंक पुर्याउनेलाई लाइसेन्स दिइने व्यवस्था गर्न लागिएको हो ।
अहिलेको ट्रायलमा सानो गल्तीले पनि लाइसेन्स नपाइने हुँदा प्रयोगात्मक परीक्षामा अंकभार तोकेर ६० प्रतिशत ल्याउनेलाई लाइसेन्स दिने गरी व्यस्था गर्न लागिएको हो ।
ट्रायल दिंदा एउटा सानो गल्तीमा पनि लाइसेन्स नपाउनु अव्यवहारिक भएको भन्दै सामान्य गल्तीमा लाइसेन्स नदिंदा दलालमार्फत जसरी पनि घुस ख्वाएरै लाइसेन्स निकाल्ने प्रवृत्ति धेरै नै छ ।
सडकमा निर्वाध सवारी चलाउन सक्नेले पनि अहिलेको सबै प्रक्रिया पूरा गरेर लाइसेन्स निकाल्न नसक्नेको संख्या धेरै छ । त्यसैले अब नयाँ प्रावधान ल्याएर सहजै लाइसेन्स प्राप्त गर्ने बाटो सरकारले खोल्न लागेको हो ।
