संसद विघटन विरुद्ध राजविराजमा ओली र भण्डारीको पुतला दहन

शुभ नारायण यादव-
सप्तरी । 
प्रतिनिधि सभा विघटनविरुद्ध जनता समाजवादी पार्टी नेपालले सप्तरी सदरमुकाम राजविराजमा विरोध प्रदर्शन गर्दै राष्ट्रपति र प्रधानमन्त्रीको पुतला दहन गरेको छ ।

राजविराजस्थित शिव मन्दिर प्राङ्गणबाट निकालिको हजारौं नेता कार्यकर्तासहितको विरोध जुलुस नगरको विभिन्न भाग परिक्रमा गरी शहिद दर्शन चौकमा पुगेर राष्ट्रपति विद्यादेवी भण्डारी र प्रधानमन्त्री केपी शर्मा ओलीको पुतला दहन गरेका हुन् ।

पुतला दहनको क्रममा सप्तरी सदरमुकाम राजविराजमा सशस्त्र तथा नेपाल प्रहरीको टोलीले परिचालन गरिएको थियो ।

पुतलासहित विरोध प्रदर्शनमा उत्रेको उक्त जुलुसको अगाडि र पछाडि व्यापक रुपमा सुरक्षाकर्मी परिचालन गरिएको थियो । आन्दोलनकारीहरुले राष्ट्रपति भण्डारी र प्रधानमन्त्री ओली विरुद्ध चर्को नाराबाजी गरेका छन् । शहिद दर्शन चौकमा पुतला दहन पश्चात आयोजित विरोध सभामा पार्टीका केन्द्रीय तथा युवा नेताहरुले सम्बोधन गरेका छन् ।

पार्टीका जिल्ला अध्यक्ष केदार यादवको अध्यक्षतामा आयोजित विरोध सभामा जसपाका केन्द्रीय नेताहरु दिनेश कुमार यादव, दिपेन्द्र चोधरि, महिलानेतृ पुनम यादव, राजविराज नगरपालिकाका मेयर शम्भु यादव, तिलाठी कोइलाडिका अध्यक्ष सतिश कुमार सिंह, विद्यार्थी नेता किशोर यादव, शम्भु यादव, युवा अध्यक्ष शिवम् यादव लगायतका नेताहरुले सम्बोधन गर्ने गर्दै संसद पुनस्र्थापनाको माग गरेका छन् ।

जनता समाजवादी पार्टी नेपालले गरेको विरोध कार्यक्रम अनुसार पुस ११ गते मसाल जुलुस प्रदर्शन र पुस १२ गते सबै जिल्लामा प्रदर्शन गर्ने कार्यक्रम रहेको पार्टीका सुनिल कुमार झाले जानकारी दिए ।