बेइजिङ । चीनले उत्तर पश्चिमी क्षेत्रमा मुस्लिम समुदायलाई आफ्नो इस्लामप्रतिको विश्वास अभिव्यक्त गर्नबाट वञ्चित गर्नुका साथै दुर्गम क्षेत्र र साना गाउँहरूमा समेत चिनियाँ अधिकारीहरुले मस्जिदहरु ध्वस्त पार्ने गतिविधि बढाइरहेका छन् ।
त्यस्ता विध्वंसहरु भित्री मंगोलिया, हेनान र निन्क्सियाको क्षेत्रमा व्यापक रूपमा सञ्चालन गरिएका छन् । यी क्षेत्रहरुमा चिनियाँ मुस्लिम अल्पसंख्यकहरुको बसोबास रहेको छ । यसबाहेक चिनियाँ अधिकारीहरूले युनान प्रान्तमा रहेका तीनवटा मस्जिद जबरजस्ती बन्द गरेको इस्लाम खबरले जनाएको छ ।
अष्ट्रेलियाली रणनीतिक नीति संस्थानले गरेको पछिल्लो अध्ययन अनुसार सन् २०१७ देखि चीनमा ६५ प्रतिशत मस्जिदहरु र ५८ प्रतिशत इस्लामिक साइटहरु ध्वस्त पारिएका छन् । यसका साथै सामुदायिक भेला तथा उत्सवहरूमा अपराधिकरण, मुस्लिम समुदायका शिक्षाविद्हरू, सांस्कृतिक व्यक्तित्वहरुलाई बेपत्ता पार्ने र सार्वजनिक क्षेत्रमा उइगर भाषा उन्मुलन गर्ने काम भइरहेको जनाइएको छ ।
केवल काश्गरमा मात्रै सन् २०१६ यता ७० प्रतिशत मस्जितहरु भत्काइएका छन् । यद्पि एथ्नोमोजीलोजिस्ट र उइघुर विशेषज्ञ राचेल ह्यारिसले यसरी ध्वस्त पारिएका मस्जिदहरुको संख्या ८० प्रतिशतभन्दा बढी भएको बताएका छन् । सम्पूर्ण पुरानो सहर ध्वस्त पारिएका छन् र त्यहाँका बासिन्दाहरूलाई विस्थापित गरिएको छ ।
इस्लाम खबरका अनुसार, चीनले सार्वजनिक रूपमा इस्लामिक प्रार्थना गर्ने स्थलहरुमा अपराधीकरण गर्ने काम गरिरहेका छन् र स्थानीय अधिकारीहरूले मुस्लिमलाई घरमा पनि प्रार्थना गर्न दिइएको छैन ।
चिनियाँ राष्ट्रपति सी जिनपिङले स्पष्टरुपमा आफ्नो समुदायलाई मुस्लिम समुदायबाट खतरा भएको भन्दै त्यसलाई निर्मुल पार्ने नीति लिएका छन् । जस अनुसार नै अल्पसंख्यक मुस्लिमहरुलाई दमन गर्ने, हत्या गर्ने, यातना दिने, विस्थापन हुन बाध्य पार्ने काम भइरहेको छ ।
चीनको सिचुआन युनिभर्सिटीले हालसालै सार्वजनिक गरेको एक दस्तावेज अनुसार गान्सु, निग्सिया, किङहाई, सिन्जियाङ, तिब्बत, भित्री मंगोलिया, हेबै र सिचुआन क्षेत्रमा एक सयभन्दा बढी मुस्लिम संरचनाहरु ध्वस्त पार्ने योजना बनाइएको छ । चीनमा आइकनिक इस्लामिक साइटहरूको विनाश गर्न उपायहरुबारे छलफल भइरहेकोसमेत जनाइएको छ ।
उक्त दस्तावेजमा भनिएको छ कि धार्मिक मुद्दाको त्यस्तो अनुचित व्यवहारले जातीय र धार्मिक मुद्दाहरूमा केन्द्रीय समितिको सुसंगत नीति र पार्टी र राज्यको विश्वसनीयतालाई पनि कमजोर पार्छ र मुस्लिमले यस किसिमको उपायमा पर्ने प्रतिकूल प्रभावलाई प्रकाश पार्दछ ।
“स्थानीय मुसलमानहरु अत्यन्त मनोवैज्ञानिक आघातबाट गुज्रिरहेका छन र स्थानीय अधिकारीहरुको कडा निगरानीमा आफ्नो पीडा व्यक्त गर्ने आँट गर्दैनन्,” दस्तावेजमा भनिएको छ ।
