टोरन्टो : पछिल्लो समय विश्वभर कोरोना महामारी फैलिइरहेको अपस्थामा चीनले आफ्नो प्रभाव विस्तार गरिरहेको छ । गत वर्षको डिसेम्बर चीनको वुहानबाट सुरु भएको कोरोना महामारीविरुद्ध सिंगो विश्व संघर्ष गरिरहेका समय चीनले भने यसलाई अवसर ठान्दै आफ्नो प्रभाव विस्तार गरिरहेको छ ।
क्यानाडाका सांसदहरुले पनि चिनियाँ प्रभावको प्रतिरोधका लागि सुरक्षा रणनीति बनाउन प्रस्ताव अघि सारेका छन् । क्यानडाको संसदमा मुलुकको ५जी नेटवर्कको विकासमा चिनियाँ कम्पनी हुवावेको सहभागीतालाई रोक्नुका साथै चिनियाँ प्रभावको प्रतिरोध गर्ने प्रस्ताव अघि सारिएको हो ।
उक्त प्रस्ताव बुधवार हाउस कमन्सले १७९ सांसदमध्ये १४६ मतले पारित गरिएको हो । जसमा जस्टिन ट्राउडो सरकारलाई एक महिना भित्र मुलुकको ५जी नेटवर्कको विकासमा हुवावेको सहभागिता नगराउने घोषणा गर्न भनिएको छ ।
“क्यानाडामा चीनको बढ्दो प्रभावलाई रोक्न सरकारले पनि योजना पेस गर्नु आवश्यक छ, अस्ट्रेलियाले ल्याएको योजना जस्तै,” मंगलबार एक प्रेस सम्मेलनमा ट्रुडोले भने, “सार्वजनिक सेवाले नेटवर्कको विकासमा हुवावेको भविष्यका बारे दृढ संकल्प गर्नेछ ।”
हुवावेका मुख्य वित्तीय अधिकारी मेंग वानजाउलाई डिसेम्बर २०१८ मा भ्याकूवरमा पक्राउ गरिसकेपछि दुवै देशबीचको द्विपक्षीय सम्बन्धको तनाव बढ्दै गएको थियो । यसपछि चीनले जासुसी गरेको आरोपमा दुई क्यानेडाली नागरिकलाई चीनमा गिरफ्तार गरी क्यानडालाई जवाफ दिएको थियो ।
यस महिनाको सुरूमा क्यानाडाको सुरक्षा खुफिया सेवाले यो कुरा पत्ता लगाएको थियो कि फक्स हन्ट नामको चीनको “भ्रष्टाचार रोक्न” अभियानले क्यानाडामा रहेको चिनियाँ समुदायका सदस्यहरुलाई प्रवासी बीचको असहमतिलाई कम गर्न आक्रमण गर्दैछ ।
गुप्तचर एजेन्सीका अनुसार क्यानाडामा यी गुप्त गतिविधिहरू बेइजिङले धम्की दिने विश्वव्यापी अभियानको हिस्साको रुपमा विस्तार गरिरहेको छ ।
अमेरिका र बेलायतले पनि चिनियाँ टेक जाइन्ट हुवावेमाथि प्रतिबन्ध लगाएको छ ।
