सिरहा । सिरहा जिल्लामा ट्राफिक प्रहरीको मनपरी कार्यशैली र अत्यधिक चेकिङका कारण सर्वसाधारण यात्रु र सवारी चालक हैरान भएका छन्। मिर्चैया देखि लहानसम्मको छोटो दुरीमा सात ठाउँमा ट्राफिक चेकिङ भइरहेको स्थानीयहरू गुनासो गर्छन्।
सवारी चालकहरूका अनुसार ट्राफिक प्रहरीले ब्लुबुक र लाइसेन्सको नाममा दैनिक लाखौं रुपैयाँ असुली गरिरहेको छ। “जहाँ-जहाँ जाँदा पनि ट्राफिकको चेकिङ, कहिले लहानमा, कहिले मिर्चैयामा, कहिले सुखिपुरमा। दिनमा २–३ पटक जाँचमा पर्नुपर्छ,” एक स्थानीय टेम्पो चालकले बताए।
चेकिङको नाममा ट्राफिक प्रहरीले गाडी रोक्नासाथ चाभी खोस्ने, चालकहरूसँग दुर्व्यवहार गर्ने र अभद्र भाषा प्रयोग गर्ने गरेको यात्रुहरूले बताएका छन्। “कागजपत्र देखाउँदा पनि विभिन्न बहाना लगाएर पैसा माग्छन्। नदिए गाडी थुन्ने धम्की दिन्छन्,” अर्को पीडित चालकले भने।
स्थानीय व्यवसायीहरूका अनुसार यस्तो निरन्तर चेकिङले यातायात सेवा प्रभावित हुनुका साथै जनजीवन कष्टकर बनेको छ। यात्रुहरू समयमै गन्तव्यमा पुग्न नसक्ने अवस्था छ भने चालकहरू मानसिक तनावमा परेका छन्।
सर्वसाधारण र यातायात व्यवसायीहरूले सम्बन्धित निकायसँग छिट्टै यो समस्याको समाधान गर्न र ट्राफिक प्रहरीको दमनकारी कार्यशैली नियन्त्रण गर्न माग गरेका छन्।
