काठमाडौं। अत्यधिक मात्रामा कर्मचारीहरूलाई बिदामा छाडेर राशनमा बदमासी गरेको पुष्टि भएपछि सशस्त्र प्रहरी बल नेपाल प्रधान कार्यालयले सल्यान र जाजरकोटका जिल्ला कमान्डरहरूलाई जिम्मेवारीबाट फिर्ता बोलाएको छ।
ती दुवै जिल्लास्थित सशस्त्र प्रहरी गुल्मका कमान्डर (डिएसपी) हरूले मातहतका कर्मचारीहरूलाई नियम विपरीत ठूलो संख्यामा बिदामा छाडेको भन्दै सशस्त्र प्रहरी महानिरीक्षकको कार्यालयमा उजुरी परेको थियो। उजुरी परेलगत्तै प्रधान कार्यालयले सशस्त्र प्रहरी वरिष्ठ उपरीक्षक (एसएसपी) को नेतृत्वमा एउटा विशेष छानबिन टोली घटनास्थलमा खटाएको थियो।
उक्त छानबिन टोलीले स्थलगत रूपमा गरेको अनुसन्धान र बुझाएको प्रतिवेदनका आधारमा दुवै गुल्मपतिहरू दोषी देखिएका हुन्। दोषी ठहरिएसँगै उनीहरूलाई कमान्डबाट फिर्ता बोलाई सशस्त्र प्रहरी बल नेपाल प्रधान कार्यालयस्थित कानुन निर्देशनालयमा हाजिर गराइएको छ।
निर्देशनालयले उनीहरूमाथि विभागीय कारबाही गरिसकेको छ भने सल्यान र जाजरकोट गुल्ममा रिक्त रहेका ती स्थानहरूमा तत्कालै नयाँ कमान्डरहरू खटाउने तयारी प्रधान कार्यालयले गरेको छ।
यसैबिच, मुस्ताङको कोरला नाकाबाट भएको अवैध तस्करी र सुरक्षा कमजोरीको अर्को एउटा घटनामा पनि सशस्त्र प्रहरीमाथि कारबाही सुरु भएको छ।
केही दिनअघि कोरला नाका हुँदै गैरकानुनी रूपमा दुईवटा ट्रकमा भित्रिएको ‘भेपर’ (इलेक्ट्रोनिक चुरोट) को विषयमा गम्भीर सुरक्षा कमजोरी देखिएपछि सशस्त्र प्रहरी बल नेपाल बोर्डर आउट पोस्ट (बिओपी) नेचुङका तत्कालीन कमान्डर एवं सशस्त्र प्रहरी निरीक्षक (इन्स्पेक्टर) माथि पनि छानबिन थालिएको छ।
कमान्डरको लापरबाहीका कारण नाकामा अवैध सामान भित्रिएको ठहर गर्दै उनीमाथि पनि कारबाहीको प्रक्रिया अगाडि बढाइएको प्रधान कार्यालयले जनाएको छ।
