नेपाल फेरि एक अराजक मोडमा उभिएको छ। हिजो काठमाडौंमा भएको हिंसात्मक घटनाले सरकारको असक्षमता छर्लंग पारेको छ। जब नागरिक आफ्नो अधिकारका लागि सडकमा उत्रिन्छन्, तब सरकारको पहिलो कर्तव्य शान्ति सुरक्षाको प्रत्याभूति दिनु हो। तर, दुर्भाग्यवश, वर्तमान ओली सरकार यसमा पूर्ण रूपमा असफल भएको छ।
जनताको सुरक्षाको प्रत्याभूति दिन नसक्ने, कानुनी शासनको पालना गराउन अक्षम, र संकट व्यवस्थापन गर्न चुकेका शासकहरूले नै आजको अस्थिरता सिर्जना गरेका छन्। जब राज्य संयन्त्र कमजोर हुन्छ, तब अवसरवादी तत्वहरू सक्रिय हुन्छन्। आज उही बलात्कारी, मूर्तिचोर, र विगतमा राष्ट्र लुटेका तत्वहरू फेरि सत्तामा आउन खोज्दैछन्। तर यो केवल दिवास्वप्न मात्र हो। जनताले लामो संघर्षपछि प्राप्त गरेको लोकतन्त्र र गणतन्त्र कुनै हालतमा उल्टिन दिँदैनन्।
सरकारप्रति असन्तोष हुनु स्वाभाविक हो। तर लोकतन्त्रको विकल्प पुनः निरंकुशता हुन सक्दैन। अहिलेको आवश्यकतालाई आत्मसात गर्दै लोकतान्त्रिक मूल्य र मान्यताहरूको रक्षा गर्न नागरिक सचेत बन्नुपर्छ। नेताहरूले आफ्नो असफलता स्वीकार गर्दै जनतासँग आत्ममन्थन गर्नु अपरिहार्य छ। देशलाई पुनः अस्थिरतातर्फ धकेल्ने होइन, सुदृढ लोकतान्त्रिक प्रणालीलाई बलियो बनाउनु आजको मुख्य आवश्यकता हो।
यस अवस्थामा, सरकार तुरुन्तै आत्मसमीक्षा गर्दै जिम्मेवारी बहन गरोस्। यदि नेतृत्व असफल छ भने, जनताको मन जित्ने उपाय खोजोस्। अन्यथा, आम नागरिकको दबाब बढ्दै जान्छ, जसको अन्त्य सुखद नहुन सक्छ। लोकतन्त्र केवल चुनाव जित्ने साधन होइन, यो नागरिकको सेवा गर्ने प्रणाली हो। सत्तामा बस्नेहरूले यसलाई बुझ्न जरुरी छ।
नेपालको भविष्य लोकतन्त्रमै सुरक्षित छ। यसको रक्षा गर्न सबै सचेत नागरिकहरू एकजुट बनौं!
