संजय यादव, ११ कार्तिक
गोलबजार, सिरहा
नेपाली काँग्रेसका नेता स्व. राजकपुर यादवको मंगलबार चौथो स्मृती दिवस मनाएको छ । सिरहाको साबिक गाबिस चन्द्रलालपुर हाल गोलबजार नगरपालिका वार्ड नं ८ चोहर्वा निवासी स्व. यादवको चौथो स्मृती दिवस एक औपचारिक कार्यक्रमका बीच मनाएको छ । नेपाली काँग्रेस गोलबजार नगर समितिको आयोजनामा भएको कार्यक्रममा प्रमुख अतिथि नेपाली काँग्रेसका नेता एवं प्रदेश नं २ का प्रदेश सभा सदस्य नरेश कुमार यादव, बिशिष्ट अथितिहरु काँग्रेस नेता मोक्तार अहमद, अमर रेग्मी, अरुण सिंह, चन्द्रदेव यादव, राजदेव साह लगायतले स्व. यादवले पार्टीको लागि गरेको योगदानको चर्चा, पार्टीले बेहोरेको अपुर्णिय क्षतीको र स्व. यादवको तस्बीरमा माल्यार्पण गरी श्रद्धाञ्जली अर्पण गर्दै हरेक साल स्मृती दिवस मनाउनु पर्ने र सिरहा जिल्लाका काँग्रेस पार्टीका पुरानो दिवंगत नेताहरुको पनि स्मृती दिवस मनाउनु पर्नेमा जोड दिएको थियो । स्व. यादव २०७४ साल कार्तिक ११ गते बस दुर्घटनामा परेर अल्पआयुमै ज्यान गुमाएको छ । राजबिराज देखि काठमाडौंको लागि छुटेको सन्देश बस धादिङ्गको गजुरी स्थित त्रिशुली नदीमा दुर्घटना भई स्व. यादव सहित ३३ जनाको ज्यान गएको थियो ।
स्व. यादव २०४८ साल देखि २०५८ साल सम्म वखलढुङ्गा जिल्लाको एक माध्यमिक विद्यालयमा बिज्ञान बिषयको माध्यमिक शिक्षक भई शिक्षण गर्दै प्रधानाध्यापक भई समेत कामकाज गर्नुभएको थियो । स्व. यादव शिक्षण पेशालाई तिलाञ्जली दिदै नेपाली काँग्रेसको राजनिति शुरु गर्दै नेपाली काँग्रेस महासमिति सदस्य तथा भात्रृ संस्था नेपाल साँस्कृतिक संघको केन्द्रीय उपाध्यक्ष भई कामकाज गरिरहनु भएको थियो । स्व. यादव स्पष्ट वक्ता र सबैलाई मिलाएर राखन सक्ने मिलनसार नेताको रुपमा चिरपरिचित रहनुभएको थियो । स्व. यादवको एक धर्मपत्नी रेखा यादव, दुई सुपुत्र रोशन र शेखर रहेका छन् ।
