काठमाडौँ : पशुपति क्षेत्र विकास गुरु योजनाको विरोध गर्दै स्थानीयले बुधबार पनि पशुपति क्षेत्र विकास कोषको कार्यालय रहेको क्षेत्र घेराउ गरेका छन् ।
उनीहरुले पशुपति क्षेत्र संयुक्त संघर्ष समिति नै बनाएर पशुपतिनाथको प्राचीनता मास्ने गरी कोषले गुरुयोजना तयार गरेको भन्दै कोष घेराउ गरेका हुन् । स्थानीय बासिन्दाले पशुपति क्षेत्रको विकासको नाउँमा परापूर्वकालदेखिको बस्ती मास्ने र पशुपति क्षेत्र भित्रको स्थानीय संस्कृति तथा जात्राको विनाश गर्ने गरी गुरुयोजना ल्याइएको आरोप लगाएका छन् । पशुपति क्षेत्रभित्र रहेका १ सय ४० पर्व र ४० वटाभन्दा बढी जात्रा मास्ने गरी कोषले गुरुयोजना ल्याएकोले विरोध गर्नुपरेको उनीहरुले भनाई छ ।
बागमती प्रदेशका प्रदेश सांसद नरोत्तम वैद्यले सरकारले स्थानीयका माग सम्बोधन गर्न खोजेको जस्तो गरेपनि समस्या समाधान हुन नसकेको बताउनुभयो ।
पशुपति क्षेत्र विकास कोषले स्थानीय बासिन्दा र स्थानीय निकायसँग समन्वय नगरी गुरुयोजना तयार पारेकाले समस्या देखिएको स्थानीयहरूले बताएका छन् ।