केन्द्रमा फेरिएको समीकरणसँगै मधेस प्रदेशमा राजनीतिक समस्या बल्झिने देखिएको हो । मधेसको सवालमा जसपा नेपाल र जनमत पार्टी विपरीत दुई ध्रुवमा उभिएका छन् ।
१०७ सदस्यीय मधेस प्रदेशसभामा बहुमतका लागि कम्तीमा ५४ सांसदको समर्थन आवश्यक हुन्छ । तर नयाँ गठबन्धनमा एमालेको २३, माओवादी केन्द्रको ९, जसपा नेपालको १८ सांसद छन् । एमालेका रामचन्द्र मण्डल सभामुख भएका कारण सांसद सङ्ख्या ४९ मात्र हुन्छ । बहुमतका लागि गठबन्धनलाई कम्तीमा अन्य पाँच सांसदको समर्थन आवश्यक देखिन्छ ।
केन्द्रको सत्ता गठबन्धनमै सामेल हुन सकारात्मक रहेको जनमत पार्टीले मधेस प्रदेशमा जसपा नेतृत्वको सरकारमा आफु कुनै पनि हालतमा सहभागी नहुने र समर्थन नजनाउने प्रस्ट पारिसकेको छ ।
जसपा र जनमत पार्टीबिचको ध्रुवीकरणका कारण पनि नयाँ गठबन्धनलाई मधेसमा सरकार गठन गर्न कठिन हुने देखिएको हो । यस्तो अवस्थामा लोसपा नेपाल निर्णायक हुने देखिन्छ । तर लोसपाले मधेस सरकारबारे अझै आफ्नो औपचारिक धारणा बनाइसकेको छैन ।
