काठमाडौं । नेपाल समाजवादी पार्टी (नेसपा) का अध्यक्ष डा.बाबुराम भट्टराई र माओवादी केन्द्रका नेताहरुबीच छलफल भएको छ । अध्यक्ष डा.भट्टराईले बिहीबारको भेटमा आगामी प्रदेश र प्रतिनिधि सभा निर्वाचनमा संयुक्त चुनावी मोर्चा गरेर जान प्रस्ताव राखेका हुन् ।
पाँच दलीय गठबन्धनमा सिट बाँडफाँटका विषयमा छलफल चलिरहेका बेला गठबन्धन दलसंग सहकार्य गरेर अघि बढ्ने नेपाल समाजवादी पाटीले रणनीतिक योजना बनाइरहेको छ । जसपाबाट अलग भएका डा.भट्टराईसहितका नेताहरुले बनाएको नेसपा पनि मोर्चामा सहभागि हुन तयार देखिएको छ । पछिल्लो पटक डा.भट्टराईले औपचारिक रुपमा आफ्नो नेतृत्वमा पार्टी गठन गरेपछि राजनीतिक भेटवार्तालाई तीव्र रुपमा अघि बढाएका छन् ।
भट्टराईले हालै प्रधानमन्त्री शेरबहादुर देउवालाई भेटेर गठबन्धनमा सहभागि गराउन आग्रह गरेका थिए । नेसपाका अध्यक्ष भट्टराईले बिहीबार माओवादी केन्द्रका अध्यक्ष पुष्पकमल दाहाल ‘प्रचण्ड’ र वरिष्ठ उपाध्यक्ष नारायणकाजी श्रेष्ठलाई भेटेर मोर्चाबारे छलफल गरेका हुन् ।