धनुषा : जनकपुरका व्यवसायीहरूले निषेधाज्ञा अवज्ञा गर्ने चेतावनी दिएका छन्। कोरोना नियन्त्रणको नाउँमा निरन्तर भइरहेको निषेधाज्ञाका कारण व्यापार धारासायी बनेको भन्दै उनीहरूले अवज्ञा गर्ने चेतावनी दिएका हुन्।
जिल्ला प्रशासन कार्यालय धनुषाले चौथौंपटक जारी गरेको निषेधाज्ञा आइतबार मध्यरातदेखि सकिँदै छ। चौथौं पटकको निषेधाज्ञा सकिनै लाग्दा धनुषा चेम्बर्स अफ कमर्सले व्यापार व्यवसायको सहज वातावरण निर्माण गर्न माग गर्दै निषेधाज्ञा अवज्ञा गर्ने चेतावनी दिएको हो।
चेम्बर अफ कमर्स धनुषाका कार्यवाहक अध्यक्ष सरोज मिश्रले जारी गरेको ध्यानाकर्षण पत्रमा ‘विगत ६ महिनाको लामो लकडाउनको मार अब खेप्न नसक्ने अवस्था आइसकेको खण्डमा यदि व्यवसायीहरूको पक्षमा सरोकारबलाको निर्णय नआए लकडाउन अवज्ञा गर्ने परिस्थति बन्न सक्दछ’ भनिएको छ।
स्थानीय स्तरमा प्रमुख जिल्ला अधिकारी एवं सुरक्षा समितिको निर्णयअनुसार लकडाउन हुने भएकोले कोरोना नियन्त्रणका लागि व्यापारीहरूलाई मात्र व्यवसायबाट बञ्चित गर्न नहुने मिश्रले बताएका छन्।
बजार व्यवसायमात्र बन्द गरेर कोरोना नियन्त्रण हुन नसक्ने भएकोले सुरक्षाको उपाय अपनाएर बजार सञ्चालनको सहज वातावरण बनाउन मिश्रले प्रमुख जिल्ला अधिकारीलाई ध्यानाकर्षण गराएका छन्।
‘महिनौंदेखि व्यवसायीहरूको सटर बन्द छ। बैंक ब्याज, बहाल, स्टाफ खर्च, विद्युत महसुलदेखि घर खर्चसम्म चलाउन नसक्ने पीडा हामी खेपी रहेका छौं। कुनै तहको सरकारको तर्फबाट उद्योगी व्यवसायीलाई विस्थापित हुन नदिन ठोस योजना नआउनु दुःखद छ।
कोरोनाको नाउँमा उद्योगी व्यवसायीलाई मात्र दुःख दिनु पक्कै पनि अनुचित हुन्छ,’ मिश्रले जारी गरेको ध्यानाकर्षण पत्रमा भनिएको छ। aayomail
