क्वालालम्पुर : दक्षिण चीन सागरमा गरेको चिनियाँ सामुद्रिक विस्तारको दाबी मलेसियाले अस्वीकार गरेको छ । यस क्षेत्रमा चीनले गरिरहेको विस्तारका कारण तनाव सिर्जना भइरहेको छ ।
मलेसियाले दक्षिण चीन सागरको पानीमा ऐतिहासिक अधिकार छ भन्ने चीनको दाबीको विरोध गरेको छ ।
चीनको मुख्या व्यापारिक साझेदार मलेसियाका विदेशमन्त्री हिशम्मुद्दीन हुसेनले एएनआईसँग कुरा गर्दै आक्रोशपूर्ण रुपमा भने, “मलेसियाली सरकारले दक्षिण चीन सागरमा समुद्री सुविधाहरू सम्बन्धी चीनको दाबीलाई पनि अन्तर्राष्ट्रिय कानुन अन्तर्गतको कुनै आधार नभएको ठान्छ ।”
विश्वले कोभिड-१९ को विश्वव्यापी महामारीका समयमा चीनलाई आफ्नो भूमिकाका लागि आह्वान गरिरहेको छ । त्यसैगरी दक्षिण चीन सागर क्षेत्रमा आक्रामकरुपमा देखिएको चीनलाई भियतनामले यसअघि नै आफ्नो सार्वभौमिकता कायम राख्न चेतावनी दिइसकेको छ ।
विश्व कोरोनासँगको युद्ध लडिरहेको बेला बेइजिङले भने दक्षिण चीन सागरका टापुहरूमा दुई प्रशासनिक इकाई स्थापना गरिरहेको छ ।
यस कार्यको पक्षमा बोल्दै चिनियाँ विदेश मन्त्रालयले जारी गरिएको विज्ञप्तिमा भनिएको छ, “राज्य परिषदको अनुमोदनपछि हेनान प्रान्तको सान्शा सिटीले दुई जिल्ला शीशा जिल्ला र नन्शा जिल्ला स्थापना गरेको छ ।
“यो चीनले आफ्नो सार्वभौमिकताको दायराभित्र प्रशासनिक विभाजन समायोजन गरिरहेको छ । यो सान्शा सहरको प्रशासनिक व्यवस्थापन सुधार र वृद्धि गर्न र सहरको आर्थिक वृद्धि र वातावरण संरक्षणको समन्वयात्मक विकासलाई प्रोत्साहित गर्न अनुकूल छ ।”
