ब्रसेल्स : युरोपियन युनियनका सांसदहरुले भारतीय प्रधानमन्त्री नरेन्द्र मोदी र भारतीय नागरिकहरुलाई बधाइ दिएका छन् ।
भारतको ७४ औं स्वतन्त्रता दिवसको अवसरमा युरोपियन सांसद थेरी मारियानीले एक सन्देश पठाउँदै भारतलाई बधाई दिएका हुन् ।
उनले सन्देशमा लेखेका छन्, “भारतको स्वतन्त्रता दिवसको अवसरमा भारतीय प्रधानमन्त्री मोदीप्रति उच्च र न्यानो सम्मान व्यक्त गर्न चाहन्छु । तपाईंको बहुआयामिक नेतृत्वले भारतले अहिले हासिल गरेको प्रगति सुन्न पाउँदा निकै खुसी लागेको छ । कोरोना महामारीका बीच पनि भारतले ठूलो प्रगति गरेको छ । तपाईंले ठूलो दबाबकाबीच पनि सफलतापूर्वक नेतृत्व सम्हाली रहनुभएको छ । आगामी दिनमा तपाईंको नेतृत्वले भारत थप प्रगति हासिल गर्नेप्रति विश्वस्त छौं ।”
उनले थपेका छन्, “हामीलाई विश्वास छ कि विश्वका अन्य मुलुकहरुले पनि तपाईंबाट प्रेरणा लिनेछन् ।”
पोल्याण्डका राजनीतिज्ञसमेत रहेका युरोपियन सांसद रिचार्ड हेनरी जारनेकीले पनि भारतलाई बधाई दिएका छन् ।
उनले भनेका छन्, “म प्रधानमन्त्री नरेन्द्र मोदीलाई भारतको स्वतन्त्रता दिवसको अवसरमा बधाइ दिन चाहन्छु । ६ वर्षदेखि सत्तामा रहँदा भारतमा एक नयाँ दिशामा प्रवेश गरेको छ । विकास, शान्ति, काश्मीरको समृद्धि र शान्ति, कोरोना महामारीविरुद्धको लडाइँका विषयमा भारतले नयाँ उचाई हासिल गरेको छ । प्रधानमन्त्रीज्यू मेरोतर्फबाट शुभकामना ।”
इटालीयन सांसदसमेत रहेका युरोपियन सांसदले भने, “भारतको स्वतन्त्रता दिवसको अवसरमा प्रधानमन्त्री नरेन्द्र मोदीलाई धेरै धेरै धन्यवाद । हामीलाई तपाईंको जादुयी नेतृत्वले गरेको विकास र समृद्धिलाई हामीले हेरिरहेका छौं । राष्ट्र विकासमा यति कटिबद्ध प्रधानमन्त्री हालसम्म देखिएका थिएनन् ।”
१५ अगस्त, १९४७ मा भारतले स्वतन्त्रता प्राप्त गरेको थियो ।
