वीरगञ्जमा टिपर र ट्रक ठोक्किँदा एकजनाको मृत्यु भएको छ भने अन्य चारजना घाइते भएका छन् । वीरगञ्ज महानगरपालिका अन्तर्गत परवानीपुर बन्दरगाह सडक खण्डमा टिपर र ट्रक ठोक्किँदा उक्त दुर्घटना भएको हो ।
बुधबार साँझ ६ बजे सडक खण्ड अन्तर्गत वीरगञ्ज–२१ परवानीपुरबाट जाँदै गरेको युपी ५२ टी ७५५० नम्बरको भारतीय ट्रक र विपरीत दिशाबाट आउँदै गरेको ना ७ ख २६६६ नम्बरको टिपर एकआपसमा ठोक्किएर दुर्घटना भएको पर्साका प्रहरी प्रवक्ता एवम् प्रहरी नायब उपरीक्षक ओम प्रकाश खनालले जानकारी दिए ।
ट्रकले ठक्कर दिँदा पैदलयात्री वीरगञ्ज–२२ जगरनाथपुर निवासी ७० वर्षे बैधनाथ राउत कुर्मीको मृत्यु भएको खनालले बताए ।
दुर्घटनामा भारतीय ट्रकका चालक भारत गोपालगञ्ज मुसहरी बस्ने आजाद अन्सरी र सहचालक नुरुल बस्सर तथा टिपर चालक मकवानपुरका बिपिन प्रसाद गडतौला र सहचालक अजय लामा घाइते भएका छन् ।
उनीहरुको नारायणी अस्पतालमा उपचार भइरहेको प्रहरीले जनाएको छ ।
