सुर्खेत : जिल्ला प्रशासन कार्यालय सुर्खेतले आज १ गतेदेखि ५ गते राति १२ बजेसम्म जारी गरेको निषेधाज्ञाको अवज्ञा गर्नेहरुलाई प्रहरीले कारवाही गरेको छ । चाडपर्व नजिकिँदै गर्दा सुर्खेतमा भीडभाड बढेको भन्दै जिल्ला प्रशासन कार्यालय सुर्खेतले वीरेन्द्रनगर नगरपालिकामा निषेधाज्ञा जारी गरेको छ ।
निषेधाज्ञाको अटेरी गर्ने १२ वटा सवारी साधन नियन्त्रणमा लिएको जिल्ला प्रहरी कार्यालय सुर्खेतका प्रहरी नायव उपरीक्षक रामप्रसाद घर्तीले बताउनु भयो । उहाँले २ महिला र ६३ पुरुष गरी जम्मा ६५ जनालाई संक्रमण रोग ऐन २०२० बमोजिम कारवाही गरिएको बताउनु भयो ।
यसैगरी जुम्लामा पनि १२ वटा सवारी साधन नियन्त्रणमा लिइएको र उलङ्घन गर्ने व्यक्तिहरुलाई भने सम्झाइ बुझाइ छोडिएको जुम्लाका प्रहरी निरीक्षक राजेन्द्र बहादुर चन्दले बताउनु भयो । जिल्ला प्रहरी कार्यालय मुगुका प्रहरी निरीक्षक भीमदत्त जोशीका अनुसार मुगुमा निषेधाज्ञाको पूर्ण पालना भएको छ । तर, साँझ ४ बजेदेखि ६ बजेसम्म अत्यावश्यक सामानका पसलहरु खुल्ने भएकोले पनि कसैले अवज्ञा गरेका छैनन् ।
निषेधाज्ञाको जिल्ला प्रहरी कार्यालय र जिल्ला प्रशासन कार्यालय सुर्खेतले अनुगमन गरिरहेका छन् । हरितालिका तीज पर्व सुरु हुनु अगावै मान्छेको भीडभाड बढ्ने र अनावश्यक रुपमा हुने चहलपहललाई रोक्नका लागि निषेधाज्ञा जारी गरिएको जिल्ला प्रशासन कार्यालय सुर्खेतको भनाइ छ ।
निषेधाज्ञाको उलङ्घन गर्नेहरुलाई स्थानीय प्रशासन ऐन २०२८ र संक्रामक रोग ऐन २०२० अनुसार कारवाही गरिने प्रशासनको भनाइ छ । निषेधाज्ञाको अवधिमा दाहसंस्कार कार्यमा समेत बढीमा १५ जना सहभागी हुन पाउने व्यवस्था गरिएको छ ।
निषेधाज्ञाको समयमा दमकल, झण्डावाल गाडि, प्रहरी, संचारकर्मी, एम्बुलेन्स जस्ता अत्यावश्यक सवारी साधन बाहेक अरुलाई आवत जावत गर्न रोक लगाइएको छ ।
