नयाँ दिल्ली । भारतका प्रधानमन्त्री नरेन्द्र मोदीले चीनको नाम नलिइ उसतर्फ संकेत गर्दै भारतले के गर्न सक्छ भन्ने लद्दाखमा देखाइसकेको बताएका छन् ।
७४ औं स्वतन्त्रता दिवसका अवसरमा शनिबार लाल किल्लाबाट सम्बोधन गर्ने क्रममा भारतीय प्रधानमन्त्री मोदीले आफूहरुका लागि भारतको सम्प्रभूताको सम्मान सर्वोच्च रहेको बताए ।
उनले भनेका छन्, “देशका लागि हाम्रा वीर जवानहरुले के गर्न सक्छन् भन्ने कुरा विश्वले लद्दाखमा देख्यो ।”
लद्दाखमा भारत र चीनबीच पछिल्लो समय सीमालाई लिएर विवाद भइरहेको छ । उनले भनेका छन्, “हाम्रा छिमेकी भौगोलिक सीमा मिल्नेहरु मात्रै होइनन्, जोसँग मन मिल्छ उनीहरु पनि छिमेकी हुन् ।”
भारत र नेपालबीच पनि सीमा विवाद छ भने पाकिस्तानसँग उसको सदियौँदेखि विवाद रहँदै आएको छ ।
यसअघि लद्दाखको गलवानी भ्यालीमा चिनियाँ र भारतीय सेनाबीच हिंसात्मक झडप भएको थियो । अहिले पनि भारत-चीनबीच सीमा क्षेत्रहरुमा तनाव पूर्णरुपमा समाधान भइसकेको छैन ।
यसअघि भारतीय प्रधानमन्त्री मोदीले लद्दाखको लेह पुगेर चीनतर्फ संकेत गर्दै विस्तारवादको युग समाप्त भएको बताएका थिए ।
