काठमाडौं : भारतले नेपाललाई दिने वार्षिक अनुदानमा वृद्धि गरेको छ । आर्थिक वर्ष २०२१र२२ का लागि सोमबार वित्त मन्त्री निर्मला सीतामरणले सार्वजनिक गरेको केन्द्रीय बजेटअनुसार नेपालले पाउने वार्षिक अनुदान अघिल्लो आर्थिक वर्षको तुलनामा एक अर्ब १२ करोड भारु (एक अर्ब ८९ करोड रुपैयाँ)ले बढी हो ।
भारतीय वित्त मन्त्रालयका अनुसार यो वर्ष नेपालले भारतबाट नौ अर्ब ९२ करोड भारु (१५ अर्ब ८७ करोड रुपैयाँ) प्राप्त गर्ने भएको छ । यसअघि भारतले आव २०२०/२१ को बजेटमा भने नेपालले पाउने अनुदानमा भारी कटौती गरेको थियो । आव २०१९/२० मा नेपालले पाउने अनुदान ११ अर्ब ९८ करोड थियो ।
गत वर्षको बजेटले यसलाई कटौती गरी आठ अर्ब ८० करोड भारुमा झारेको थियो । तर, आज सार्वजनिक भएको बजेटमा भने नेपालले पाउने अनुदानमा वृद्धि भएको हो । यो बजेट अप्रिल २०२१ बाट कार्यान्वयनमा आउने छ । भारतले पहिलो पटक पेपरलेस बजेट ल्याएको छ । जसमा स्वास्थ्य क्षेत्रलाई उच्च प्राथमिकतामा राखिएको छ ।
भुटानलाई सबैभन्दा बढी अनुदान
भारतले विभिन्न मुलुकलाई दिने अनुदानमध्ये सबैभन्दा बढी रकम भूटानलाई छुट्टयाउने गरेको छ । यो रकममा समेत भारतले उल्लेख वृद्धि गरेको छ । आव २०२१/२२ मा भूटानले भारतबाट ३० अर्ब चार करोड भारु पाउने छ । चालु आव २०२०/२१ मा भने भुटानले २२ अर्ब ६१ करोड पाएको थियो । त्यसअगाडिको आवमा भने २६ अर्ब ६७ करोड रुपैयाँ भारु भुटानलाई भारतले दिएको थियो । यो वर्ष अनुदानका रुपमा भुटानपछि नेपालले बढी पाएको छ ।
कुन देशलाई कति अनुदान (भारुमा)
भुटान : ३० अर्ब चार करोड
नेपाल : नौ अर्ब ९२ करोड
अफगानिस्तान : तीन अर्ब ५० करोड
बंगलादेश : दुई अर्ब
श्रीलंका : दुई अर्ब
माल्दिभ्स : दुई अर्ब ५० करोड
म्यानमार : चार अर्ब
