काठमाडाैं। प्रधानमन्त्री सुशीला कार्कीलाई ज्ञापन पत्र बुझाउन नपाएपछि बिभिन्न जेन-जी युवा समूहहरु आक्रोशित भएका छन्।
प्रधानमन्त्रीको सचिवालयमा आफन्त र नातेदारलाई नियुक्ति दिएको विरोधमा प्रधानमन्त्री कार्कीलाई ज्ञापत्र पत्र बुझाउन उनीहरु सोमबार प्रधानमन्त्री कार्यालय पुगेका थिए। तर प्रधानमन्त्रीलाई प्रत्यक्ष भेट्न नपाएपछि उनीहरु आक्रोशित भएका हुन्।
प्रधानमन्त्री कार्यालयको गेटमा बिभिन्न समूहका जेनजी युवाहरुको भीड बढेपछि प्रधानमन्त्रीका प्रमुख सल्लाहकार अजयभद्र खनालले उनीहरुको मागका बारेमा जानकारी लिएका थिए।
खनालले प्रधानमन्त्रीको सचिवालयमा आफन्त र नातेदारलाई नियुक्ति दिएको बिषयमा आएको समाचारहरुमा पूर्ण सत्यता नरहेपनि केही सत्यता रहेको बताएका थिए। जेनजीले उठाएका माग जायज रहेकाले त्यसमा छलफल गर्ने आश्वासन दिएका थिए।
जेन-जी युवा समूहहरुले भने प्रधानमन्त्रीले नै आफूहरुको कुरा सुन्नुपर्ने अडान राखेका थिए। आफूलाई भेट्न जेन-जी युवाहरु मुख्य गेटमा पुगेपनि प्रधानमन्त्री कार्की भने मन्त्रिपरिषद् बैठक सकेर बाहिरिएकी थिइन्।
यसैगरी मिराज ढुंगाना नेतृत्वको जेन-जी समूहले प्रधानमन्त्री सुशीला कार्कीले फोन संवाद समेत गर्न नचाहेको भन्दै आपत्ति जनाएका छन्। सोमबार दिनभर प्रधानमन्त्रीलाई भेटनका लागि सम्पर्क गर्दा प्रधानमन्त्री कार्कीले मोबाईल फोन अफ गरेर सम्पर्क समेत गर्न नचाहेको भन्दै खेदसमेत व्यक्त गरेका हुन्।
प्रधानमन्त्री सचिवालयबाटै आफन्त र नातेदारलाई नियुक्ति गर्ने काम भएपछि प्रधानमन्त्री कार्कीलाई भेट्न सिंहदरबार दक्षिण गेट पुगेका उनीहरु गृहमन्त्री ओमप्रकाश अर्यालसँग समेत सम्पर्क हुन नसकेपछि निराश भएर फर्किएका छन्।
उनीहरुले जेनजीहरुको आवाज सुन्ने धैर्यता राख्न पनि प्रधानमन्त्री कार्कीलाई चेतावनी दिएका छन्। प्रधानमन्त्रीले समेत मोबाईल फोन स्विच अफ गरेर सम्पर्कमा आउन नचाहेपछि दुःख लागेको जेन-जी अभियन्ता सुशील बुढोथोकीले बताए।
