काठमाडौं । इजरायलले मंगलबार राति गाजामा हवाई आक्रमण गरेको छ। इजरायली अधिकारीहरूले हमासले ‘अमेरिकाले सुरु गरेको युद्धविराम उल्लङ्घन गरेको’ आरोप लगाएका छन्।
इजरायली रक्षामन्त्री इजरायल काट्जले हमासले इजरायली सैनिकहरूमाथि आक्रमण गरेको र बन्धकहरूको शव फिर्ताको सर्तहरू उल्लङ्घन गरेको आरोप लगाए।
हमासले आक्रमणमा कुनै पनि संलग्नता अस्वीकार गरेको छ र युद्धविरामप्रति “पूर्ण रूपमा प्रतिबद्ध” रहेको बताएको छ।
हमासका स्वास्थ्य अधिकारीहरू र नागरिक रक्षा एजेन्सीका अनुसार इजरायली आक्रमणमा ३३ प्यालेस्टिनीहरू मारिएका छन्।
यी आक्रमणहरूले गाजा शहर, बेइत ला र खान युनिस लगायत अन्य शहरहरूमा घर, विद्यालय र धेरै आवासीय भवनहरूमा क्षति पुर्यायो।
यसका बाबजुद पनि अमेरिकी उपराष्ट्रपति जेडी भान्सले युद्धविराम अक्षुण्ण रहेकोमा आफू अझै पनि विश्वस्त रहेको बताए।
यसअघि, मंगलबार साँझ इजरायली प्रधानमन्त्री बेन्जामिन नेतान्याहूको कार्यालयबाट जारी गरिएको संक्षिप्त विज्ञप्तिमा उनले सेनालाई ‘कडा आक्रमण’ गर्न आदेश दिएको बताएका थिए, तर यसको पछाडिको कारण भने बताएका थिएनन्।
अर्कोतर्फ, इजरायली विदेशमन्त्री इजरायल काट्जले मंगलबार गाजामा इजरायली सैनिकमाथि आक्रमण गरेर हमासले ‘रातो रेखा पार गरेको’ बताए।
उनले चेतावनी दिए, “हमासले सैनिकहरूमाथि आक्रमण गरेको र बन्धकहरूको शव फिर्ता गर्ने सम्झौता उल्लङ्घन गरेकोमा धेरै उच्च मूल्य चुकाउनुपर्नेछ।”
इजरायली मिडिया रिपोर्टहरूले मंगलबार दिउँसो दक्षिणी गाजा शहर रफाहमा इजरायली सेनाहरूमाथि ट्याङ्क विरोधी मिसाइल र स्नाइपर आक्रमण भएको बताएका छन् भने प्यालेस्टिनी मिडियाले सोही समयमा इजरायली गोलाबारी भएको रिपोर्ट गरेका छन्।
प्रत्यक्षदर्शीहरूले बताएअनुसार उत्तरमा गाजा शहर र दक्षिणमा खान युनिस जस्ता शहरहरू इजरायली आक्रमणमा परेका थिए।
हमास नियन्त्रित नागरिक रक्षा एजेन्सीका प्रवक्ताले बीबीसीलाई बताएअनुसार गाजा शहरको दक्षिणमा रहेको साब्रा क्षेत्रमा एउटा घरमा बम विस्फोट हुँदा तीन महिलासहित चार जनाको मृत्यु भएको छ।
रिपोर्टका अनुसार अल-शिफा अस्पतालमा पनि आक्रमण भएको थियो।
नागरिक रक्षा प्रवक्ताले खान युनिसमा पनि एउटा गाडीलाई ठक्कर दिँदा दुई बालबालिका र एक महिलासहित पाँच जनाको मृत्यु भएको बताएका छन्।
हमासले एक विज्ञप्ति जारी गर्दै आफ्ना लडाकुहरूले इजरायली सैनिकहरूलाई आक्रमण नगरेको बताएको छ।
“हमासले रफाहमा भएको गोलीकाण्डको घटनासँग आफ्नो कुनै सम्बन्ध नभएको र युद्धविराम सम्झौताप्रति प्रतिबद्ध रहेको स्पष्ट पार्छ। गाजा पट्टीका क्षेत्रहरूमा फासीवादी इजरायली सेनाले गरेको आपराधिक बमबारी युद्धविराम सम्झौताको स्पष्ट उल्लङ्घन हो,” विज्ञप्तिमा भनिएको छ।
यसैबीच, संगठनको सैन्य शाखाले मंगलबार एक बन्धकको शव फेला पारेको बताएको छ, तर इजरायली बमबारीका कारण उनलाई फिर्ता गर्ने प्रक्रिया स्थगित गरिएको छ।
“युद्धविराम लागू भएको छ। यसको अर्थ यहाँ र त्यहाँ केही सानातिना झडपहरू हुनेछैनन् भन्ने होइन,” अमेरिकी उपराष्ट्रपति भान्सले वाशिंगटनमा पत्रकारहरूलाई भने।
उनले थपे, “हामीलाई थाहा छ कि हमास वा गाजा भित्र अरु कसैले इजरायली सैनिकलाई आक्रमण गरेको थियो। हामी इजरायलले जवाफ दिने अपेक्षा गर्छौं, तर मलाई विश्वास छ कि राष्ट्रपतिले स्थापित गरेको शान्ति अक्षुण्ण रहनेछ।”
यसअघि इजरायली प्रधानमन्त्रीले हमास विरुद्ध “केही कदम चाल्ने” वाचा गरेका थिए।
