काठमाडौं। एएफसी एसियन कप छनोट फुटबल प्रतियोगिताका लागि नेपाली राष्ट्रिय महिला फुटबल टोलीको घोषणा गरिएको छ। उज्वेकिस्तानमा यही असार १५ गतेदेखि सुरु हुने उक्त अन्तर्राष्ट्रिय प्रतियोगिताका लागि अखिल नेपाल फुटबल संघ (एन्फा)ले अञ्जिला तुम्बाप्पो सुब्बाको कप्तानीमा २३ सदस्यीय टोली घोषणा गरेको हो।
घोषित टोलीमा गोलकिपरका रूपमा कप्तान अञ्जिला तुम्बाप्पो सुब्बासँगै अञ्जना रानामगर र उषा नाथ रहेका छन्।
डिफेन्स लाइनमा अमृता जैशी, प्रतीक्षा चौधरी, गीता राना, विमला विक, पूजा राना, निशा थोकर, समीक्षा घिमिरे, विमला चौधरी र मनमाया दमाई चयनमा परेकी छन्।
मिडफिल्डरका रूपमा अनिता बस्नेत, रेनुका नगरकोटे, प्रीति राई, सरु लिम्बू, सविता रानामगर र सरस्वती हमाल छन् भने
फरवार्ड लाइनमा सावित्रा भण्डारी, रश्मीकुमारी घिसिङ, चन्द्रा भण्डारी, अनिता केसी र रेखा पौडेल रहेका छन्।
नेपाल समूह ‘एफ’ मा परेको छ। उक्त समूहमा नेपालसँगै उज्वेकिस्तान, लाओस र श्रीलंका रहेका छन्।
छनोट प्रतियोगिता एसियन कप प्रवेशका लागि अत्यन्त महत्वपूर्ण हुने भएकाले नेपाली टोली यसपटक उत्कृष्ट प्रदर्शन गर्ने लक्ष्यसहित तयारीमा जुटिरहेको एन्फाले जनाएको छ।
