चितवन, असार ९ — बुटवल–नारायणगढ सडक खण्डअन्तर्गत नवलपरासी (बर्दघाट सुस्तापूर्व) क्षेत्रको दुम्कीवास आसपासको वैकल्पिक मार्ग पनि पूर्ण रूपमा अवरुद्ध भएको छ। लगातारको वर्षापछि पानीको बहाव अत्यधिक बढेपछि सवारी आवागमन ठप्प भएको हो।
विनयी त्रिवेणी गाउँपालिका–१ स्थित दुम्कीवासको मूल पुल भाँचिएपछि अस्थायी डाइभर्सनमार्फत सवारी सञ्चालन गरिएको थियो। तर, हालैको भारी वर्षाले उक्त डाइभर्सन बगाएपछि वैकल्पिक रूपमा खोलिएको भित्री मार्ग पनि आज बिहानदेखि पूर्ण रूपमा बन्द भएको जिल्ला प्रहरी कार्यालयका प्रहरी उपरीक्षक यादव ढकालले जानकारी दिए।
उनका अनुसार विनयी त्रिवेणी–३ मा रहेको खरंगे खोलामा आएको बाढीले भित्री मार्गसमेत भत्काएपछि होल्डमा राखिएका साना तथा मध्यम (१२ चक्केसम्मका) सवारीसाधनलाई प्रयोग गरिँदै आएको सर्दी–ज्यामिरे मार्ग पनि ठप्प भएको हो।
वर्षा र अस्थायी पूर्वाधारमा भर पर्नुपर्ने बाध्यता भएकाले यात्रुहरूलाई निकै सास्ती भएको प्रहरीले जनाएको छ। अहिले दाउन्ने–दुम्कीवास सडक खण्डमा सवारीसाधनको आवागमन पूर्ण रूपमा रोकिएको छ।
सडक पुनः सञ्चालनमा ल्याउन आवश्यक तयारी भइरहेको भए पनि लगातारको वर्षाले तत्काल समस्या समाधान हुने अवस्था नरहेको प्रहरीले जनाएको छ। यातायात अवरुद्ध हुँदा यात्रुहरू बाटोमै अलपत्र परेका छन्।
