महेश सिंह, लहान – सिरहा जिल्लाको गोलबजारमा भव्य राहु पूजा सम्पन्न भएको छ। आठ छोरीपछि छोरा प्राप्तिको भाकल पूरा गर्न आयोजित यस पूजामा हजारौं श्रद्धालु सहभागी भएका थिए।
गोलबजार नगरपालिका–१ निवासी रबिलाल पासमान र उनकी श्रीमती कुशमा देवी पासमानले करिब २५ वर्षअघि सूर्य देवतासँग छोरा प्राप्तिको लागि भाकल गरेका थिए। आठ छोरीपछि छोरा रामकृष्ण पासमान जन्मिएपछि उनले करिब तीन लाख रुपैयाँ खर्च गरेर विशेष पूजा गराएका हुन्।
पूजामा सिरहा, सप्तरी, धनुषा लगायतका जिल्लाबाट आएका भक्तजनहरूको ठूलो भिड लागेको थियो। स्थानीय राजलाल पासमानका अनुसार राहु पूजा सबै समुदायका लागि खुला रहन्छ। परापूर्वकालदेखि चल्दै आएको यो पूजामा लहान–१४ पिडरबोनीका छुतहरू पासवान मुख्य पूजारीका रूपमा रहेका थिए।
दोस्रो पुजारी हरी पासमानका अनुसार राहु पूजामा ५६ करोड देवी–देवतासँगै मिथिलाञ्चलका प्रसिद्ध राजा सल्हेश र राजा चोहरमलको विशेष पूजा गरिन्छ। “राहु भनेको दैवी शक्ति हो। यो पूजा विशेष गरी सन्तान प्राप्ति, दोष निवारण र पारिवारिक सुखका लागि गरिन्छ,” उनले भने।
पूजाको अन्तिम दिन गोलबजारमा मेलाको माहोल देखिन्थ्यो। श्रद्धालुहरूका लागि स्थानीय स्वयंसेवकहरूले भोजन, पानी र आवासको व्यवस्था गरेका थिए। स्थानीय बासिन्दा टेकराज पासमानले भने, “यति ठूलो भीड लागेको मैले पहिले कहिल्यै देखेको थिइनँ। गाउँ नै मेला जस्तो बनेको थियो।”
मुख्य पूजारी छुतहरू पासवानका अनुसार राहु पूजा सूर्य देवता दिनकरसँग सम्बन्धित भएकाले विशेष गरी माघ महिनामा गरिन्छ। स्थानीय समाजसेवी राजकुमार पासमानले भने, “राहु पूजा परापूर्वकालदेखि चल्दै आएको महत्वपूर्ण अनुष्ठान हो। यसपालि झनै भव्य रूपमा सम्पन्न भएको छ।”
यस पूजाले धार्मिक तथा सांस्कृतिक महत्त्व स्थापित गर्नुका साथै स्थानीय पर्यटन प्रवर्द्धनमा पनि टेवा पुग्ने विश्वास गरिएको छ।
