काठमाडौं । अमेरिकाको लस एन्जलसको जंगलमा लागेको आगो लगातार बढिरहेको छ । आगलागीले धेरै क्षेत्रलाई जलाएको छ ।
अमेरिकी अधिकारीका अनुसार आगलागीका कारण अहिलेसम्म सात जनाको मृत्यु भइसकेको छ । लस एन्जलसका पलिसेडेस, ईटन, हर्स्ट, लिडिया र केनेथ क्षेत्रहरूमा यो आगो फैलिएको छ ।
यी पाँच क्षेत्रमध्ये सबैभन्दा बढी आगो पलिसेडेसमा फैलिएको छ । प्यासिफिक पलिसेडेसमा भएको आगलागीबाट करिब २० हजार एकड क्षेत्र प्रभावित भएको छ । अहिलेसम्म ६ प्रतिशत मात्र आगो नियन्त्रणमा आएको छ ।
इटनमा लागेको आगलागीका कारण अल्टाडेना र पासाडेनामा करिब १४ हजार एकड क्षेत्र जलेको छ । यहाँको आगो एक प्रतिशत पनि नियन्त्रणमा आउन सकेको छैन ।
आगो फैलिएको पाँच क्षेत्रमध्ये केनेथ सबैभन्दा नयाँ हो। क्यालिफोर्नियाको वेस्ट हिल्सस्थित लस एन्जलस र भेन्चुरा काउन्टीको ९६० एकड क्षेत्र आगलागीबाट प्रभावित भएको छ । आगो एक प्रतिशत पनि नियन्त्रणमा आउन सकेको छैन ।
अग्नी नियन्त्रकहरूले सिलमार, हर्स्टमा ७०० एकडमा लागेको आगो नियन्त्रण गर्ने प्रयास गरिरहेका छन्। हालसम्म १० प्रतिशत आगो नियन्त्रणमा आएको छ ।
फायर फाइटरहरूले लिडियामा ६० प्रतिशत आगो नियन्त्रणमा लिएका छन्। यहाँ एक्टन सहरमा करिब ४०० एकड क्षेत्र आगलागीबाट प्रभावित भएको छ ।
