महेश सिंह लहान, मंसिर २८- प्यापसन (प्राइभेट एन्ड बोर्डिङ स्कूल एसोसिएसन नेपाल) लहान नगरको अध्यक्षमा लक्ष्मण चौधरी सर्वसम्मतिबाट पुनः चयन भएका छन्। शुक्रबार सम्पन्न तेस्रो नगर अधिवेशनले चौधरीलाई दोस्रो कार्यकालका लागि सर्वसम्मत चयन गरेको हो।
प्यापसनका निवर्तमान अध्यक्ष चौधरीको अध्यक्षतामा सुरु भएको अधिवेशनमा लहान नगरपालिकाका नगर प्रमुख महेश प्रसाद चौधरी प्रमुख अतिथिका रूपमा सहभागी थिए। कार्यक्रममा ५० जना शैक्षिक क्षेत्रका प्रतिनिधिहरूको उपस्थिति थियो।
अध्यक्ष चौधरीले निजी तथा सामुदायिक विद्यालयहरूको गुणस्तर वृद्धि, शुल्कको एकरूपता र विद्यार्थीको सर्वाङ्गीण विकासलाई प्राथमिकतामा राखेर काम गर्ने प्रतिबद्धता जनाएका छन्। “गुणस्तरीय शिक्षा, अतिरिक्त क्रियाकलापको प्रवर्द्धन र आपतकालीन अवस्थामा सहकार्यलाई हाम्रो मुख्य लक्ष्य बनाउनेछौँ,” उनले भने।
अधिवेशनले ७ सदस्यीय नयाँ कार्यसमिति चयन गरेको छ। सचिवमा बिरेन्द्र प्रसाद चौधरी, कोषाध्यक्षमा राकेश गुप्ता, र सदस्यमा नवीन कुमार चौधरी, भरत यादव, र कविता सिंह चयन भएका छन्।
कार्यक्रममा नगर प्रमुख महेश प्रसाद चौधरीले शिक्षामा सुधारका लागि स्थानीय तह र शैक्षिक संस्थाबीच सहकार्य आवश्यक रहेको बताए। “शिक्षाको गुणस्तर सुधार्न हामी सदैव तयार छौँ,” उनले भने।
नयाँ कार्यसमितिले सामुदायिक विद्यालयमा सुधारका लागि विशेष अभियान सञ्चालन गर्ने, शिक्षक-शिक्षिका तालिमलाई प्राथमिकता दिने र निजी विद्यालयहरूको व्यवस्थापनलाई प्रभावकारी बनाउने योजना अघि सारेको छ।
कार्यक्रममा विद्यालय शुल्क, पाठ्यक्रम सुधार, र विद्यार्थीका अतिरिक्त क्रियाकलापको महत्त्वबारे छलफल भएको थियो। नव निर्वाचित अध्यक्ष चौधरीले सामुदायिक र निजी विद्यालयबीचको समन्वयमा आधारित काम गर्न जोड दिएका छन्।
प्यापसन लहान नगर समितिले आगामी कार्यकालमा स्थानीय र राष्ट्रिय शिक्षा क्षेत्रमा देखिएका चुनौती समाधान गर्न सक्रिय पहल गर्ने योजना बनाएको छ।
