धनुषा : आफ्ना कर्मचारीहरुमा कोरोना भाइरस संक्रमणको लक्षण देखिन थालेपछि जिल्ला प्रशासन कार्यालय महोत्तरीले अत्यावश्यक सेवा बाहेक सम्पूर्ण सेवा बन्द गरेको छ ।
एक सूचना जारी गरी जिल्ला प्रशासन कार्यालय महोत्तरीले यस कार्यालयका कर्मचारीहरुमा कोरोना भाइरस संक्रमण जस्तो मिल्दो जुल्दो लक्षण देखिन थालेपछि सेवाग्राहीहरुको स्वास्थ्यलाई उच्च प्राथमिकता राख्दै अत्यावश्यक सेवा बाहेक अन्य सबै सेवा आइतवारदेखि बन्द गरिएको जनाएको छ ।
प्रमुख जिल्ला अधिकारी कृष्णबहादुर कटुवालद्वारा जारी सो सूचनामा ठाडो उजुरी एवं निवेदन, मुद्दा, शान्ति सुरक्षा, विपद् व्यवस्थापन र हातहतियार नवीकरण सम्बन्धी सेवा बाहेक सम्पूर्ण सेवा बन्द गरिएको जनाइएको छ ।
हुनत यसअघि असोज ३० गतेदेखि नै विजयादशमीमा हुन सक्ने भीडभाडको मध्यनजर गर्दै जिल्लाभरिका मठ मन्दिर र विभिन्न शक्तिपीठ तथा पूजा स्थलहरुमा निषेधाज्ञा जारी गरिसकिएको छ ।
प्रशासनले निषेधाज्ञा जारी गरेपनि शक्तिपीठ तथा पूजा स्थलहरुमा श्रद्धालु भक्तजनहरुको दिनहुँ ओइरो लाग्ने गरेको देखिन्छ ।
