लक्ष्मीपुर पतारी गाउँपालिका–२ मा आयोजित वृक्षारोपण कार्यक्रममा जेसिजले आफ्नो समाजसेवी भावलाई सशक्त रुपमा प्रस्तुत गरेको छ। पाँचौं दिनको कार्यक्रमअन्तर्गत जनता डोमी चौधरी माध्यमिक विद्यालय, प्राविधिक धारमा वृक्षारोपण गर्दै वातावरण संरक्षण र सामुदायिक योगदानमा थप सकारात्मक पहल गरेको हो।
कार्यक्रम संयोजक शशि शेखर यादव र कार्यकारिणी उपाध्यक्ष नित्य नन्द साहको नेतृत्वमा सम्पन्न उक्त कार्यक्रमले विद्यालयलाई हरियाली र सौन्दर्य प्रदान गर्ने उद्देश्य राखेको थियो। वृक्षारोपण कार्यक्रम विद्यालयका निमित्त प्रधानाध्यापक तारिणी प्रसाद चौधरीको उपस्थितिमा सम्पन्न भयो।
कार्यक्रमका प्रमुख अतिथि तथा जेसिजका पूर्व अध्यक्ष मुरारी प्रसाद साहले समाजसेवाको महत्वबारे धारणा राख्दै विद्यालयका विद्यार्थीलाई थप प्रेरणा प्रदान गरेका थिए। कार्यक्रममा समाजसेवी तथा पूर्व प्याप्सनका जिल्ला कोषाध्यक्ष मनोज सिंह र गाउँ समिति सुधारका वरिष्ठ सल्लाहकार चन्द्र शेखर यादवको पनि विशेष उपस्थिति रहेको थियो।
बर्तमान जेसिज अध्यक्ष उमेश यादवले आफू यही विद्यालयको विद्यार्थी भएको स्मरण गर्दै विद्यालयप्रति मायाको प्रतीकस्वरूप वृक्षारोपण कार्यक्रमलाई विशेष प्राथमिकता दिएको बताए। उनले विद्यालयलाई वातावरणीय दृष्टिकोणले आदर्श बनाउन जेसिजले निरन्तर सहकार्य गर्ने प्रतिबद्धता जनाए।
जेसिजले प्रत्येक वर्ष पर्वको रूपमा सामुदायिक कार्यक्रमहरू गर्दै आएको र यसपटकको वृक्षारोपण कार्यक्रम वातावरणीय सन्देश मात्र नभई, विद्यालय र समुदायबीचको सम्बन्धलाई थप प्रगाढ बनाउन केन्द्रित भएको आयोजकले जनाएका छन्।
विद्यालयका प्रांगणमा सम्पन्न वृक्षारोपण कार्यक्रमले हरियाली र वातावरणीय सन्तुलनका लागि समुदायलाई सन्देश दिन सफल भएको सहभागीहरूले बताए।
