लहान–१८ मा हरियाली अभियान: जन्मदिनलाई समाजसेवामा रूपान्तरण

महेश सिंह सिरहा, लहान –जन्मदिनलाई सामाजिक कार्यसँग जोड्दै लहान नगरपालिका–१८ पकडियागढ मन्दिर परिसरमा वृक्षारोपण कार्यक्रम भव्य रूपमा सम्पन्न गरिएको छ। जेसिज नागेश्वर महतो (सन् २०२६ का जनसम्पर्क अधिकारी–PRO) को २७औँ जन्मदिनको अवसरमा आयोजित उक्त कार्यक्रमले वातावरण संरक्षण तथा सौन्दर्यकरणमा महत्वपूर्ण सन्देश दिएको छ।
कार्यक्रममा जेसिजकर्मी, समाजसेवी, बुद्धिजीवी, राजनीतिकर्मी तथा इष्टमित्रहरूको उल्लेखनीय उपस्थिति रहेको थियो। कार्यक्रममा सहभागी सबैप्रति महतोले हृदयदेखि आभार व्यक्त गर्दै यस्ता सामाजिक कार्यमा निरन्तरता दिने प्रतिबद्धता जनाए।
लहान नगरपालिका–१८ सोभापुर निवासी बुवा विनोद कुमार महतो र आमा चन्द्रकला देवी महतोका जेठा छोरा नागेश्वर महतो सानैदेखि समाजसेवामा सक्रिय र समाजहितमा समर्पित रहँदै आएका छन्। उनले आफ्नो जन्मदिनलाई केवल व्यक्तिगत उत्सव नभई सामाजिक उत्तरदायित्वसँग जोड्दै वृक्षारोपणमार्फत सकारात्मक उदाहरण प्रस्तुत गरेका छन्।
पकडियागढ (पोकरियागढ) पर्यटकीय क्षेत्रमा गरिएको वृक्षारोपणले स्थानीय वातावरण संरक्षणसँगै सौन्दर्य अभिवृद्धिमा टेवा पुग्ने अपेक्षा गरिएको छ। उक्त स्थानमा प्रत्येक वर्ष बैशाख २ गते भव्य मेला लाग्ने र हजारौँ पर्यटकको आगमन हुने भएकाले यस क्षेत्रको संरक्षण र विकासमा यस्तो पहल महत्वपूर्ण मानिएको छ।
लहान सिटी जेसिजका अध्यक्ष बमचन्द्र चौधरीले समाजमा यस्ता सकारात्मक सोच भएका युवाहरूको आवश्यकता रहेको उल्लेख गर्दै जेसिजको तर्फबाट महतोको कार्यको प्रशंसा गरे।
कार्यक्रममा दुर्गानन्द महतो, शिवानन्द चौधरी, विजय महतो, मुकेश महतो लगायतका व्यक्तित्वहरूको उपस्थिति रहेको थियो भने काङ्ग्रेस नेता राउतको प्रमुख आतिथ्यतामा वृक्षारोपण कार्यक्रम सम्पन्न भएको हो।
यस प्रकारको अभियानले वातावरण संरक्षणप्रति जनचेतना अभिवृद्धि गर्दै समाजलाई सकारात्मक दिशातर्फ अग्रसर गराउने विश्वास गरिएको छ।