कपिलवस्तु : जिल्ला प्रशासन कार्यालय कपिलवस्तुले यस बर्षको दशैंमा दुर्गा पूजाका लागी माटाले बनेका मूर्ति राख्न प्रतिबन्ध लगाएको छ ।
भिडभाड भई कोरोना संक्रमण फैलिन सक्ने देखिएको हुँदा प्रतिबन्ध लगाइएको प्रमुख जिल्ला अधिकारी दीर्घ नारायण पौडेलले जानकारी दिनुभयो । कपिलवस्तु जिल्लामा दशंैको बेलामा गाउँ गाउँमा मूर्ति राख्ने प्रचलन रहेको छ ।
प्राय जसो मधेसी समुदाय र थारु समुदायले माटोले बनेका मूर्ति पुजा गर्ने परम्परा रहेको छ । मूर्ति बनाउनका लागी भारतीय कालिगड नेपाल आउने समेत गरेका थिए । नेपालीहरु सिमावर्ती भारतीय बजारमा गई मूर्ति ल्याई पुजा गर्ने गर्दै आएका थिए ।
दुर्गा मूर्ति बिसर्जनका क्रममा कपिलवस्तुमा पटक पटक हिंसाका घटना समेत भएका थिए । गत वर्ष मूर्ति बिसर्जनका क्रममा झडपका क्रममा कृष्णनगर नगरपालिकामा प्रहरीको गोली लागी एक जनाको मृत्यृ समेत भएको थियो । प्रशासन कार्यालय बिज्ञप्ती जारी गर्दै बाजागाजा नबजाउन र भिडभाड नगर्न समेत अनुरोध गरेको छ ।
