आरती साह मृत्यु प्रकरणको छानबिन सुरु भएको छ । प्रहरी नायव महानिरीक्षक (डीआईजी) उमेश जोशी नेतृत्वको एक टोली जनकपुर आएर आरती साह मृत्यु प्रकरणको छानबिन सुरु गरेको हो ।
नेपाल प्रहरीका केन्द्रीय प्रवक्ता भीम ढकालका अनुसार छानबिन गर्न राष्ट्रिय प्रहरी प्रशिक्षण प्रतिष्ठानमा कार्यरत जोशीका नेतृत्वमा पाँच सदस्यीय टोली आएको हो ।
जोशीसँगै केन्द्रीय अनुनसन्धान ब्यूरो (सीआईबी) मा कार्यरत एसपी होविन्द्र बोगटी, डीएसपी जागेश्श्वर भण्डारी, इन्सपेक्टर शान्ता लामासहित पाँच जना जनकपुर आएर अनुसन्धान थालेका हुन् ।
गत फागुन २९ गते राति लामो समयदेखि आन्दोलनरत्त मृतक आरती साहको परिवार र गृहमन्त्रालयबीच पाँच बुँदे सहमति भएको थियो । मृत्युबारे थप अनुसन्धान गरेर प्राप्त प्रमाण अदालतमा पेश गर्ने गरी केन्द्रीय अनुसन्धान ब्यूरो (सीआईबी) को टोली खटाउने, अनुसन्धान टोलीले परिवारसँग समन्वय गरेर अनुसन्धान गर्ने र कार्य प्रारम्भ गरेको ४५ दिनभित्र ४ वटा विषयमा जाँच गर्ने, कर्तव्य ज्यान सम्बन्धी मुद्दाको अनुसन्धान भएको कमी कमजोरीहरुका बारे अनुसन्धान गर्ने र परिवारमाथि प्रहरीबाट भएको कुटपिट र दुर्व्यवहारबारे पनि जाँच गर्ने सहमति भएको थियो ।
जनकपुर उपमहानगरपालिका–९, थापाचोककी २२ वर्षीया आरती शाहको ७ जेठमा आफ्नै घरमा मृत अवस्थामा भेटिएपछि काव्या अस्पताल पुर्याइएको थियो । जहाँ उनलाई मृत घोषणा गरेको थियो । आत्महत्या गरेको माइत पक्षलाई परिवारजनले जानकारी दिएको थियो । माइत पक्षले छोरीको हत्या भएको भन्दै सुक्ष्म रुपमा अनुसन्धान गर्न आन्दोलन गरेका थिए ।
घटना हुनुभन्दा दुई वर्षअघि मोतीबाबु साहसँग उनको विवाह भएको थियो । माइतीपक्षको दाबी अनुसार, विवाहमा दाइजोसहित उनीहरुलाई २५ लाख रुपैयाँ दिइएको थियो ।
तर, मत्यु हुनुअघिका महिनाहरुमा दाइजो कम भएको भन्दै आरतीलाई घरमा यातना दिइने गरेको माइती पक्षको आरोप थियो ।
मृत्यु पश्चात् आरतीकी श्रीमान मोतीबाबु कारागारमा छन् । केही दिन अघि जनकपुरबाट सासु र देवर पक्राउ परेका थिए ।
