राजविराज । नागरिक अगुवा एवं पुर्व सभामुख दमननाथ ढुंगानाले नेताहरुले परिवर्तन ठूलै ल्याएपनि त्यस अनुरुप काम नगर्दा देशमा नैराश्यता मात्रै बढेको बताएका छन् ।
मंगलबार दिउँसो राजविराजस्थित नेपाल पत्रकार महासंघ, सप्तरीको सभाहलमा पेशाकर्मीसँगको अन्तरकृया कार्यक्रममा उनले यस्तो कुरा बताएका हुन् ।
जनआन्दोलन,मधेश आन्दोलन लगायतले देशमा संघीयताजस्तो शाषण ल्याएपनि नेताहरु त्यस अनुरुप काम गर्न नसकेको बताए । नेताहरु परिवर्तनलाई आत्मसात गर्दै अगाडि बढ्नुको सट्टा लुट्न व्यस्त रहेको उनले बताए ।
‘परिवर्तन ठूलै भएपनि जनअपेक्षा अनुसार काम हुन सकेको छैन’ उनले भने, ‘नेताहरु लुट्न व्यस्त छन् भने जनता निराश बनेका छन् ।’
नेताहरु जनअपेक्षा पुरा गर्नुभन्दा आफनो मान्छे नियुक्ती गर्न र कमाउनमा मात्रै ध्यान दिएको बताउँदै उनले मुख्य तीन पार्टी नेपाली कांग्रेस, नेकपा एमाले र नेकपा माओवादी केन्द्र राज्यको संयन्त्र लुट्न व्यस्त रहेको बताए ।
नेताहरु कम्पनी खडा गरेजस्तो पार्टी खडा गरेको भन्दै उनले कम्पनीको काम कमाउने मात्र हुने गरेको बताए । देश बनाउन चाहनेहरु स्वतन्त्र उम्मेदबार बनेपनि जनताले जिताइदिदैनन्’ उनले भने, ‘यहीं तीन पार्टीले विकास गर्छ भन्ने सोंच अझै जनतामा छ ।’
तर तीन पार्टीले जनताको विश्वाससँग खेलिरहेको भन्दै अब सच्चिएर नआए २०८४ मा जनताले अर्कै दल खोज्नुपर्ने उनले बताए ।
निर्वाचन ब्यबस्था खर्चिलो भएको बताउँदै उनले करौडौ करोड खर्च गरेर टिकट बेच्ने र किन्ने काम भइरहेको बताए । यसले जनताको हित हुनै सक्दैन’ उनले भने ।
राणा कालका क,ख र ग श्रेणीमा राणहरुलाई बिभाजन गरिएजस्तै अहिले क श्रेणीमा रहेका नेताहरुले भ्रष्टाचार गरेपनि उनलाई कुनै कारवाही नहुने गरेको ढुंगानाले आरोप लगाए । ‘कानुनी राज्य छैन्,अदालत सकसमा छ,न्यायाधिस नियुक्तीमा दलिय भागवण्डा छ’ पुर्व सभामुख ढुंगानाले भने,‘लुट चलिरहेको छ,सरकारै लुट गरिरहेको छ ।’
