रसुवा । चिनियाँ नयाँ वर्षका कारण रसुवागढी नाकाबाट सामान आयात नहुने भएको छ । शुक्रबार बिहानदेखि नै रसुवागढी नाकाबाट व्यापारीका सामान आयात भएको छैन ।
शुक्रबार बिहानदेखि नाकाबाट सामान आयात नभएको रसुवा भन्सार कार्यालयका प्रमुख भन्सार अधिकृत नारायणप्रसाद भण्डारीले बताए । ‘नयाँ वर्षका कारण १५ दिनसम्म सामान आयात नहुने अनौपचारिक जानकारी आएको छ,’ उनले भने ।
आगामी फेब्रुअरी ३ सम्म नाकाबाट सामान आयात नहुने जानकारी आएको उनले बताए । यस नाकाबाट हुने आयात पनि न्यून मात्रामा छ । अहिले नाकाबाट दैनिक चाइनीज १४ कन्टेनर मात्र सामान आयात भइरहेकोमा हालका लागि रोकिएको हो ।
यसअघि बिहान ७ र बेलुका ७ गरी दैनिक १४ कन्टेनर मात्र सामान आयात भइरहेको थियो। बिहीबारदेखि नै केरुङमा रहेका भन्सार एजेन्टले कन्टेनरमा सिल लगाउन छोडिसकेको रसुवाका व्यवसायी धर्म पौडेलले बताए ।
चिनियाँ नयाँ वर्षका कारण हरेक वर्ष यसै समयमा केरुङमा रहेका सरकारी कार्यालयहरु नै बन्द हुने गर्छन् । सरकारी कार्यालय नै बन्द भएपछि सामान आयात रोकिएको उनले जानकारी दिए । नेपाली सामान चीनतर्फ निर्यात हुन थालेको पनि एक महिना भएको छ । तीन वर्षपछि रसुवागढी नाकाबाट नेपाली सामान चीनतर्फ निर्यात भएको हो । निर्यात खुलेको एक महिनामा नेपालबाट ३९ कन्टेनर सामान चीन निर्यात भएको छ ।
रसुवागढी नाकाबाट अहिलेसम्म करिब ६ करोड मूल्य बराबरको ३९ कन्टेनर सामान चीनतर्फ निर्यात भएको छ । सामान आयत निर्यात भए पनि मानिसको आवतजावत हुन सकेको छैन । यस नाकाबाट (कोभिड–१९) अगाडिको अवस्थामा व्यापारीका सामान सहज रुपमा आउन अझै सकेको छैन । रसुवागढी नाकाबाट आयात–निर्यात प्रभावित भएको तीन वर्ष पूरा भइसकेको छ ।
२०७६ माघ १५ देखि नै रसुवागढी नाका भएर चीनबाट हुने आयात तथा निर्यात प्रभावित भएको थियो । सुरुमा हिमपात र ल्होसार पर्वका कारण आयात, निर्यात बन्द भएको थियो । पछि कोरोना महामारीपछि रसुवागढी नाका भएर चीनबाट हुने आयात निर्यात थप प्रभावित भयो ।
पाँच महिनाभन्दा लामो समय भने कोरोना महामारीका कारण नाका ठप्प रहेको थियो । २०७७ असार २२ गतेबाट पुन: सामान आयात सुरु भए पनि निर्यात ठप्प थियो । आयात सुरु भए पनि कहिले कोरोना, कहिले पहिरो र हिमपातका कारण पटकपटक नाका प्रभावित हुँदै आएको छ ।
चीनबाट हुने धेरैजसो आयात २०७२ मंसिरदेखि यही नाकाबाट हुँदै आएको छ । रसुवागढी नाका चीनबाट नेपालमा व्यापार हुने सबैभन्दा पुरानो नाका हो । रसुवागढी नाकाबाट तयारी कपडा, स्याउ, चप्पल, रबर, प्लाष्टिकका जुत्ता चप्पल, हाते झोला, छालाको जुत्ता, मोटरको ब्याट्री, युपीएस, प्लाष्टिकका सामान लगायत वस्तुहरु आयात हुने गरेको छ ।
नेपालबाट चीनतर्फ बाँसको मुडा, अम्रिसो, मैदा, डाल्टा घिउ, चाउचाउ, पास्ता, बिस्कुट, जुस, जाम, चिउरा, लप्सीको क्याण्डी, चकलेट, सख्खर, चुइगम लगायत वस्तु निर्यात हुँदै आएको थियो । नेपालको रसुवागढी नाकाबाट केरुङसम्मको दूरी २४ किलोमिटर रहेको छ ।
