चार दिन अघि महोत्तरीको सहोरवाबाट अपहरणमा परेका ईसर सिद्दिकी अपहरणमुक्त भएका छन्।
उनलाई मंगलबार राती मधेस प्रदेश प्रहरी कार्यालय जनकपुरबाट प्रहरी निरीक्षक उमाशङ्कर साहको नेतृत्वमा खटिएको प्रहरी टोलीले जिल्ला प्रहरी कार्यालय महोत्तरीको सहयोगमा नेपाल भारत सिमाना मटिहानीबाट अपहरणमुक्त गराएका हुन्।
उनको अपहरणमा संलग्न व्यक्तिलाई फिरौती रकमसहित पक्राउ गरेको हो। अपहरणमा संलग्न भारत मधुवनी बेतहा पर्साका मो मुकतार शेखलाई फिरौतीमा लिएको ९ लाख रुपैयाँसहित मंगलारबार राति प्रहरीले पक्राउ गरेको हो।
सिरहा लहान घर भएका सिद्दिकी पुस ९ गते काठमाडौँबाट जनकपुर आएका थिए। जनकपुरको विमानस्थलमै उनको मोबाइलमा नयाँ नम्बरबाट फोन गरी विदेश जानू छ भन्दै महोत्तरीको सहोडवा बोलाएर अपहरण गरिएको बताइएको छ। सिद्दिकी वैदेशिक रोजगारमा नेपालबाट मजदुर पठाउने काम गर्दै आएका थिए।
फिरौती रकमसहित पक्राउ परेका मुकतार शेखलाई जिल्ला अदालत महोत्तरीबाट म्याद थप गराउने तयारी भइरहेको जिल्ला प्रहरी कार्यालय महोत्तरीका प्रहरी उपरीक्षक कृष्ण पंगेनीले बताए।
उनले भने ‘उनीहरूबिच पुरानो लेनदेन विवाद थियो। आर्थिक लेनदेनको विवादका कारण अपहरण भएको हो। यस विषयमा अनुसन्धान हुँदै छ।’
सिद्दिकीलाई अपहरण गरी अपहरणकारीले पहिला फिरौतीका लागि ५० लाखको डिमाण्ड गरेका थिए। तर चार दिनसम्म चलेको बार्गेनिङपछि अपहरणकारी ९ लाख फिरौती लिएर सिद्दिकीलाई छाड्न सहमत भएका थिए।
